立法會內務委員會主席選舉嘅風波搞咗足足超過半年，早前立法會主席梁君彥先行出招，強調上屆主席李慧琼有權有責去處理未能處理嘅議程，先將波拋咗畀李等佢先行解決《國歌法》呢個不能不解決嘅政治任務；今早(15日)新鮮熱辣，梁君彥再動用「尚方寶劍」，命令財委會主席陳健波「霸王硬上弓」主持下周一朝早召開嘅內委會主席選舉會議，稱得上為過去半年鬧局「一錘定音」。

　　所謂嘅「尚方寶劍」，指嘅係立法會議事規則第92條。條例原文係咁：「對於本議事規則內未有作出規定的事宜，立法會所須遵循的方式及程序由立法會主席決定；如立法會主席認為適合，可參照其他立法機關的慣例及程序處理。」

　　簡單咁講，92條就係一個大包圍，只要「議事規則無講明嘅」，都可以由大主席去揸主意決定點做。你可以話呢條條文賦予大主席無限權力，但大家嘅爭拗點其實只係第一句「對於本議事規則內未有作出規定的事宜」。呢句係畀一個限制大主席，就係佢只能夠喺議事規則之內未有講清楚嘅事宜，有權去揸弗點樣處理。

　　梁君彥公布完佢嘅決定之後，泛民例牌列陣大反撲，指明內委會選主席有晒議事規則、內務守則講到「清清楚楚」，主持選舉嘅應該係資歷最深嘅議員，由第二個取代郭榮鏗，亦理應係涂謹申負責，而梁決定陳健波上場係粗暴濫權、無據可依；陳健波見記者時就用第二個角度去睇，指內會七個月選唔到主席又唔知幾時選到，係議事規則內未有作出規定嘅事，用92條係非常合適。

　　其實喺郭榮鏗把持內會主席選舉期間，已經有人提及大主席可以用92條治郭榮鏗，有建制派中人就話，立法會法律顧問應該早已經同大主席講92條嘅威力同佢嘅限制，所以先令到梁遲遲唔敢動真格。依家梁喺兩辦嘅巨大壓力之下，又得到御用大律師嘅肯定，冒住畀泛民司法覆核嘅風險都要推陳健波上場主持內會主席選舉。至於怕唔怕被覆核成功，建制派中人就話：「排得期嚟下屆立法會嘅議員都坐定定喺會議廳啦！告咪由得佢告，解決眼前問題更重要！」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！► 立即行動