快樂退休——精神科覆診記

　　正常大都會打工一族，尤其具責任心、上進心及自我有要求的，必定四十歲開始捱出各種病。不少病，一出現，就跟足一世。

 

四十歲開始，我已成公院門診常客，非常懂得擅用等候的時間

成年、具責任心、向上心及自我要求高的打工一族，必有三幾種長期病隨身，宜先了解尋找醫療之道

　

　　呢呢，我就有血壓高、眼中風、心臟病及精神情緒病。全部按時要覆診。

 

我五年前，就是如相中人一樣，不懂愛惜眼睛，終在午夜眼中風

 

　　到公院覆診，當然麻煩，次次排大隊。但我呢，排隊時睇吓手機報紙外，也可觀察其他病人，時間好快過。到見醫生時，若有少少幽默感，都幾好玩㗎！

　

　　前天又到精神科覆診期，照舊在大堂等呀等。然後，護士大大聲嗌咪：「曾智華，七號窗。」

　

　　小弟話晒有少少知名度，一嗌名，全場上百對眼睛立即行注目禮再交頭接耳。慣晒，正常。

　

　　入到診症室，睇開的顧問醫生已退休，換上一位五十開外，有少少師奶feel的阿姐醫生。戴上口罩，全程望住電腦講：「曾先生，X教授退休，我接手，循例問基本問題吓！」

　

　　之後，開始一問一答。問得短，我回答也短，但個心自己同自己再答，好好玩！

　

　　「重有冇自殺傾向，想死？」（口：冇！心：嘩！退休後咁好玩，點會想死？最好活到百二歲！）

 

對人表現樂觀，內心充滿負能量，正是我一度的人生寫照

 

　　「家人關係點呢？」（口：和諧！心：日日俾老虎乸哦時，唔出聲咪冇事囉！重有，仔大女大，間中窒為父兩句，「骨」聲吞咗佢就算，一隻手掌拍唔響，人老精自然鬼老靈啦！）

 

與老婆大人相處，是項一生的藝術

 

　　「有冇暴肥？」（口：近期宅在家，肥咗兩磅！心：唔該你抬頭望下我啦，咁Fit，點會暴肥呀？）

　

　　「瞓唔瞓得？」（口：瞓得！心：哈哈哈，晚晚灌幾杯紅酒，即時變爛瞓豬啦。退休後無牽無掛，晚晚一落床就到天光。重有呀，學埋國內高幹，下午又來個晏覺添呀，唔知幾正！）

 

能熟睡、百病除。若你失眠，一定要找出原因根治

 

　　「退休後，有冇覺得無聊，覺得悶？」（口：冇！心：悶？乜嚟㗎 ？我日日寫咁多嘢，又十六小時凡清醒就會在我的Fanpage 「Luke Sir曾智華」發帖，娛樂幾萬個擁躉，日日將渣斗高官當沙包咁打，代大眾發洩怨氣，都唔知幾正，邊會悶㗎？）

 

今天我的「事業」，正是要為支持自己的四萬多粉絲，每日帶來精神與心靈的充實。這是項很快樂又會「上癮」的工作

 

　　「胃口好唔好？」（口：好！心：遇上垃圾食物就胃口差到不得了。遇上美味的，就狂風掃落葉，隔離唔食嗰碟都（口趙）埋！）

　

　　「曾先生，唔錯，下年見啦，好唔好？」（口：好！心：咁好玩，不如個個月來玩吖？）

　

　　今期，真係「快樂覆診」嘞！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇