2021-10-15
《經濟不停學》ESG唔止做善事，避險、增長可兼得
投資市場近呢幾年興講ESG，話要睇環境（Environmental）、社會（Social）同公司管治（Governance），好似投資都可以做善事咁。其實ESG啫係將上面三個因素納入投資指標，而唔係單單以帳面價值為基礎做投資，會評估番企業經營嘅可持續性同對社會價值觀嘅影響。喺呢個標準下，仲有唔同嘅選股方法添。
ESG概念入面，環境涵蓋氣候風險、天然資源稀缺、污染及廢棄物等主題以及環境相關投資機會；社會指包括勞工問題同產品責任、資訊安全等風險以及利益相關者異議；公司治理包含董事會素質、治理同成效等議題。
ESG投資者角色對選股更為重要
依家嘅ESG投資多數係同環保議題有關，事關環保真係大命題嚟，美國政府目標喺2030年前碳排放至少減低一半、2035年前實現淨零碳排目標；中國目標2030年前實現碳達峰（二氧化碳排放見頂）、2060年前實現碳中和。可以預期各國政府未來會推出更多政策支持環保相關產業發展，投資者發掘到搵錢機會一啲都唔出奇。
碳中和意思係排放嘅二氧化碳以其他方式全部抵消。（iStock圖片）
除咗增長潛力外，將ESG因素納入投資程序最大嘅好處係可以減低風險。如果投資一間ESG標準偏低嘅公司，之後受罷工、訴訟、政府政策針對嘅機會會高啲，假設有某公司一直用持有大數據嘅優勢壟斷市場，管理層對公司內部性騷擾問題視而不見，政府推反壟斷法，同爆出性醜聞就會係呢間公司嘅潛在風險，可能拖累日後回報。
另外，投資者本身有機會係一啲退休基金、慈善團體、環保、工人組織等等，佢哋本身有自己嘅理念，投資番擁有相同理念嘅公司就合晒何車，而且投資額愈大話語權就愈多，更可以推動公司做出更多符合自己理念嘅行動。
ESG都有評級分
MSCI嘅ESG評級以AAA級為最佳。（MSCI官網截圖）
不過，一般投資者好難知道一間公司有幾符合ESG理念。其實標普道瓊指數、明晟、富時羅素等會出ESG評分／評級，缸友可以拎嚟做參考。有啲基金公司會追蹤ESG評分／評級嚟設計產品。例如有啲基金會囊括大部份股票，而個股權重就按ESG評分調整。
其他選股方法有剔除同挑選特定主題法，前者會避免投資化石燃料、博彩、煙草、軍火等原罪產業，後者會按需要專登選擇一啲可再生能源、環境保護、可持續發展相關嘅企業。
若然將ESG投資概念套番落港股，有做新能源業務嘅車股、光伏、風電股都會係好選擇，但當然唔可以盲目入市，要睇下企業基本面同做技術分析啦。
撰文：吳藹林
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇
