RSS訂閱 近期香港富豪最熱鬧當屬四大家族之一嘅鄭裕彤家族，新世界(00017)地產業務面臨流動性壓力，富三代鄭志剛辭任行政總裁，由前任發展局局長馬紹祥頂上，但係事情只過咗兩個月，就傳出馬紹祥即將離任，由執董黃少媚接任喎。喺外媒率先公布傳聞之後，新世界就連同新世界百貨(00825)一齊突然停牌，八九不離十，事態發展認真drama，夠拍新一輯《溏心風暴》。
新世界嘅劇情發展我哋以後慢慢傾，今日講間啱啱放榜嘅公司新高教集團(02001)，而家市值無咗超過一半，報0.91銀淪為毫子股。
公司業績其實還好，截至8月31日止年度純利7.56億銀人仔，按年升7.5%，收入24億人仔按年增加13.8%，弊就弊在今年唔再以現金派息，建議全部以新股份代替現金派發。睇番上年同期每股派息都有10.5港仙㗎，今年派息水平睇落好似高咗，每股25港仙，但係有cash邊個仲想揸股票呢？小股東「no money no talk」反面走人。
咁究竟點解新高教要虧待股東？公司話要保留現金作為集團的業務發展和營運需要，並且避免增加集團資本負債比率，同埋期望以股代息計劃將能提高股份交易嘅流動性喎。三個理由之中最後一個可以忽略不計，先睇第一個理由，公司截至8月底現金同等價物有13.8億銀人仔，比去年同期多過超過六成，再考慮埋收入方面都增加咗13%，要發展咩業務先會keep住咁多現金過人世？至於流動性問題，公司今年負債/資產比率係62.7%，的確比去年同期增加咗0.9個百分點，不過都仍然低於兩年前嘅65%。
從宏觀角度考慮，現代人選擇唔生仔甚至唔結婚都好正常，牟利型教育機構面對少子化等社會人口結構變化，加上教育內捲令未來高等教育競爭程度進一步白熱化，所以公司留番啲現金，希望轉型做高等教育，都勉強講得通嘅。歸根究底，公司唔想派錢但又想「回饋」股東，所以決定以股代息，不過你唔係大笨象滙控(00005)，股價表現又唔爭氣，股民邊有得咁長情，係時間講聲「Sayonara」！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇
