小米(01810)隔晚公布業績，截至9月底止第三季純利為53.52億元人幣，按年升9.8%，非國際財務報告會計準則計量，經調整淨利潤62.52億元人幣，按年增4.4%，勝預期。期內，收入按年增30.5%至925億元人幣，亦勝預期。

　　小米算唔算業績好呢？絕對好，手機業務喺中低端市場佔有率穩定，已經做到「又平又靚又正」，咁毛利率點解壓低呢？好明顯，係中美貿易問題令晶片成本提高，目前小米用緊高通3nm晶片，有傳小米自研晶片已經有盼頭，但一日未成功都唔敢亂講，唔怕被人制裁咩。

　　另一方面，「蘇7」（SU7）嘅成功都係公司業績亮點之一，公司已經提前完成十萬輛車交付，全年新目標係13萬輛。雖然坊間對於呢架車仲有好多批評，但電車來講，Ultra版可以跑到350公里確實「大癲」；而平民入門版都係20萬人仔，以「電跑」來講算係性架比超高，但質量可以再改進。

　　你會問，點解出左業績，股價都唔上？大佬啊，你唔好咁癡線啦，你睇下小米個股價，由今年8月都係15蚊，炒到而家接近30蚊啦！出左業績，早兩個月入貨個班仲唔套現食糊咩！

　　咁小米股價仲有無得上？基本上炒SU7交付量呢個消息已經接近尾水，往後再上似乎跟大市關係比較多，所以入唔入手，視乎你有幾睇好個市囉。

《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇