《小傳日記》魚缸呢個８月都算小奇蹟，觀望咗成個月，臨到月尾先嚟食個尾胡，升過４００點又升破１８０００，但尾市明顯有淡友唔抵得被挾，勁沽重磅ＡＩＡ（０１２９９）、ＱＱ（００７００）同美團（０３６９０），搞到恒指最後都係保唔到１８０００收市，但好啲就係收高到喺百天線之上。　　回顧今個月初可以話係亞洲區黑夜，當時美國經濟衰退憂慮加劇，加上日本央行預告會再加息，於是乎就一炮隊冧日股，日韓台股齊齊暴跌，而日円就係咁升。就係日韓台水深火熱之際，　　魚缸就成功彰顯低殘「優勢」，沽無可沽之下根本就無貨可以沽，反而跑贏返亞洲區內股市，難得地威返次。而就喺８月５號呢日，恒指日線圖上畫咗大大粒「十字星」，成交１３００億銀有多，活脫脫就成為咗教科書式嘅轉勢訊號。　　呢日之後魚缸無即時大升，反而開始咗心驚膽顫嘅業績期。業績期間，孖屐因為上一星期嘅亞洲股災已告一段落，外圍氣氛回暖返啲，所以魚缸都未至於太淡。到今日睇返成個８月業績期，數落其實有七至八成重點股份嘅業績都係唔錯，ＱＱ、巴巴（０９９８８）、ＡＩＡ都唔係太差，大致符合預期或好過預期一啲，甚至會出現好似京東（０９６１８）咁嘅驚喜。不過魚缸就係保守，大錢唔肯流入，所以恒指差唔多維持咗成個月嘅乾升。　　直到上個星期五，聯儲局主席鮑威爾喺Ｊａｃｋｓｏｎ　Ｈｏｌｅ年會終極放鴿，講明「係時候減息」！雖然早有預期，但等咗咁耐終於落實，總有啲興奮情緒。美股都升返唔少，但港股就係繼續維持乾升。今個星期尾聲，業績算係有辣有唔辣，一隻就係理想（０２０１５）第二季收入升但純利跌，令人真係意識到減價戰嘅禍害。但相反同日公布業績嘅美團，喺無預期之下就有大大驚喜，成功殺出一條新路。結果臨到期結日，魚缸先跌後升，成交終於重返千億銀，到今日仲有成１７００億銀兼企穩百天線。　　恒指今日上過１８２００就受阻回落，原因係１８２００其實係月線圖上２０ＳＭＡ所在，呢條線嘅阻力自２０２１年８月港股開始大跌浪以來就無突破過，所以今日收唔到１８２００都係正常。但始終今日都算升過１００天線，而且大成交，１００天線支持都確立咗大半了，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【etnet 30周年】多重慶祝活動一浪接一浪，好禮連環賞！ ► 即睇詳情