《小傳日記》小米炒車釀三死股價插一成，公關處理不足要反思

　　上周六（29日）晚，有3名女大學生駕駛小米(01810)SU7前往安徽池州，車輛喺銅陵高速碰撞護欄後火光衝天，事故造成3人身亡。對於事故發生時自動緊急制動係咪失靈、智駕提示接管係咪及時，同埋事故後車門係咪鎖死，都存在爭議。

　　有專業人士表示，事故車輛為小米SU7標準版，未配置激光雷達，僅靠攝像頭進行道路識別，且事發時間為夜晚，光線較差，可能會導致無法及時識別障礙物的情況。另一方面，從接管提示到事故發生，前後僅有2秒時間供司機反應，亦係造成今次事故嘅最關鍵原因。

　　小米汽車於噚日（1日）中午，亦即係事發後兩日，通過官方微博回應稱，事發後集團第一時間成立專項小組，喺3月0日趕赴銅陵配合調查。又澄清事故車輛起火並非部分網傳嘅「自燃」。針對網友質疑車門斷電後無法開啟，小米澄清，四個車門嘅配置，即使電池受損都可以打開。

　　或者得知家屬不滿，集團噚晚第二份聲明中提到，喺警方嘅許可和指導下，該公司曾試圖當天早些時候同遇難者家屬會面，但公司仲等緊回覆。之後小米創辦人雷軍回應話，無論發生乜嘢事，小米都唔會迴避，會持續配合警方調查。

　　作為汽車生產商，澄清事件本來可以理解，但唔知點解，小米官方微博第一條回應俾人嘅感覺係撇清責任先，澄清唔係小米配置嘅電池問題，又否定車門打唔開嘅質疑。其實，事故原因相信仲未下結論，小米就咁快就澄清，反而忽略對家屬嘅安撫，難怪家屬唔賣帳。

　　據報，其中一名遇難者母親喺內地社交平台微博上表示，自悲劇發生以來，小米一直沒有聯繫過家屬。至於遇難司機嘅父親就批評雷軍嘅發聲「虛偽」，佢話事發後小米並沒有聯繫佢，一路都係個女嘅男朋友主動搵小米客服。

　　事故既已發生，唔多唔少會打擊消費者信心以及社會評價，但後續要做嘅嘢仲有好多，技術改良呢啲係後話，反而眼前公關處理更重要，畢竟迫在眉睫。而家信息大時代，小米選擇喺事件發生後三日先出來回應，無疑係慢咗好幾拍，甚至幾乎同家屬在社交平台上同步發言，顯然係低級錯誤。小米未能防範意外於未然，自然就要承受苛責，而未能及時安撫家屬，就肯定係重大缺失。

　　件事噚日曝光後，小米股價逆市跌逾半成，今日恒指接近平收，小米再插4%，兩日股價蒸發近一成，對一間萬億市值企業來講，即係唔見咗成千億銀。雖然股價下跌主要係對小米汽車信心嘅動搖，但係公關處理欠穩妥，肯定會雪上加霜，希望其他車企引以為戒，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。