份屬潮州同鄉 馬浚偉勁讚周秀娜醒目女

　　【晴報專訊】馬浚偉（馬仔）親自製作及主持的電視節目《緣來自咖啡》，早前邀請曾在劇集《宮心計2深宮計》合作的周秀娜和劉心悠做嘉賓，大談理想與人生。馬仔大讚兩位女神美貌與智慧並重，是圈中少見的有原則、目標清晰及堅持自我的優秀演員。

馬浚偉笑言咖啡配美人周秀娜，是賞心樂事。

　　馬浚偉表示原來自《宮心計2深宮計》之後，他與兩位美女已有一段時間沒有聚頭：「好開心得到佢哋兩位支持，我哋會透過社交平台保持聯絡，知道對方近況，今次再見面，兩位狀態好好，係百分百靚女！」原來馬仔與周秀娜同屬潮州人，彼此更有親切感，馬仔表示娜姐以「模」身份出道時，他已十分留意對方：「周秀娜畀我嘅感覺好特別，佢好有思想，聽過佢嘅訪問，無論對答、內容，都表現得大方得體，感覺好有修養，即使面對一啲好尖銳，甚至難堪嘅問題，佢都答得不慍不火，好有智慧，的確與別不同。」

（左起）周秀娜、馬浚偉與劉心悠因拍《宮心計2深宮計》結緣。

　　馬仔特別佩服娜姐的勤力，多年來見證她成長、進步：「佢永遠知道自己想要咩，努力去爭取，有今日嘅成績同知名度，絕對唔容易。」娜姐則表示一直很尊重馬仔這位大哥哥，跟他相處，會覺得人生充滿希望，非常勵志，她說︰「真係唔知佢何來咁多時間、咁多精力做咁多嘢，好厲害，又識照顧其他人，佢係我嘅學習榜樣。」

難忘劉心悠帶飯入廠

　　至於另一位女神劉心悠，馬仔最記得拍《宮心計2》時，只有他和心悠每天都帶自家飯入廠，證明他們對飲食有要求。馬仔說︰「心悠勤力專業，做人好有規劃，好清楚自己要過點樣嘅人生，真正做到律己以嚴、待人以寬。我好欣賞佢嘅生活態度，可以喺圈中堅持原則唔容易呀！」心悠笑言曾與馬仔約定一齊飲咖啡，今次終於有機會：「我平時每日都飲一、兩杯咖啡，馬仔親自沖嘅咖啡好特別，我好鍾意飲呀。」

轉載自: 晴報

想要獨家投資理財Tips？即Like etnet 全新Facebook專頁► 立即讚好