首日開工即咀嘴 唐詩詠：馬德鐘成日挑逗我

　　【晴報專訊】馬德鐘與唐詩詠昨日出席無綫新劇《我家無難事》拜神儀式，兩人首度合作飾演夫妻，而且開工第一天便拍攝親熱戲。不過二人默契十足，詩詠笑言出奇地輕鬆，感覺猶如老夫老妻，更預告會拍攝親熱床戲。

唐詩詠視馬德鐘為偶像，二人首次合作便甚有默契。

　　馬德鐘、唐詩詠、鮑起靜、王君馨、車婉婉和關禮傑等，昨日到無綫電視城出席拜神儀式。自認是馬德鐘粉絲的詩詠，如今夢想成真與偶像拍劇，而且合演夫妻，令她開心不已。詩詠透露跟馬德鐘開工第一日便拍接吻戲，笑言感覺很好︰「起初都擔心會唔會緊張，但結果好老夫老妻，唔使時間熱身，好似我哋已經錫過咁。」

　　詩詠表示稍後會拍親熱戲：「仲有床戲未拍，佢（馬德鐘）成套戲都喺度挑逗我，不過佢令氣氛好輕鬆，大家有講有笑，完全無壓力。」馬德鐘亦表示跟詩詠非常合拍︰「可能大家處理劇本方向好一致，大家埋位後都好順暢。」可有相逢恨晚的感覺？詩詠笑說︰「由依家開始展望將來，我哋除咗拍愛情戲，仲可以嘗試其他題材。」

王君馨右腳受傷無阻親熱戲

右腳受傷的王君馨（右），拍照時輕挽黃嘉樂手臂借力。

　　王君馨早前拍劇集《超能使者》時，弄傷右腳足踝導致韌帶斷裂，她昨日要用拐杖輔助行路，坦言起碼再休息三星期後，才可以跳舞。她說：「當日喺三尺高地方跳落地，聽到『啪』一聲，原來前韌帶斷咗，側邊同後邊嘅韌帶撕裂。」她笑言幸好在《我家無難事》中動作戲不多，之前跟楊明拍親熱戲時，也只是滾來滾去：「親熱戲都係集中喺上半身，所以影響唔大。」

轉載自: 晴報

【香港好去處】etnet全新頻道盛大推出！全港最齊盛事活動資訊盡在掌握！► 即睇