默認入結婚墳墓 黎明演唱會上暗示已再婚

　　【晴報專訊】黎明（Leon）前晚順利完成一連九場《Leon黎明Talk & Sing 2021紅館演唱會》，Leon與女助手Wing的感情事一向低調，但Leon在前晚尾場演唱會中，自認已進入了結婚的墳墓，似暗示已經再婚。

 

Leon解釋自己以前受訪時說話太「跳線」，才有「金句王」的稱號。

 

　　黎明尾場個唱吸引不少圈中人捧場，包括前緋聞女友李嘉欣和老公許晉亨、林建岳、余德丞、蔡思貝等。身穿白色西裝的Leon以一曲《夏日傾情》揭開序幕，緊接一口氣獻唱多首經典金曲；在唱畢《情深說話未曾講》後，Leon便開始talk show部分，他憶述早於20多年前到韓國宣傳時，已經有人教他用手指做心心手勢，他表示︰「個人唔太鍾意做『細藝嘢』，特別係男人，感覺好肉麻同含蓄；如果對住熱情嘅人做，對方又會無乜感覺，咁不如直接講『I love you』。」

 

請自己做嘉賓

 

Leon前緋聞女友李嘉欣和老公許晉亨拍拖睇騷。

 

　　至於歌迷最期待的嘉賓環節，尾場由黎明「一人分飾兩角」，Leon笑說︰「黎明請黎明無問題，頭先嘅黎明已經入咗棺材（意指結婚是男人的墳墓），我代佢由棺材行番出嚟，唱《情緣》畀大家聽。」其實早於首場個唱，嘉賓林海峰已稱呼Wing為「黎太」，當時Leon未有否認，他前晚更暗示已經再婚，首度公開Wing的「天王嫂」地位。

 

Leon直言自己不喜歡做「手指心心」。

 

　　在演唱會尾聲，Leon突然有感而發︰「有時我都想自己坐喺下面聽黎明唱歌，但唔得。」之後他做出心形手勢，繞場一圈答謝觀眾，並送上祝福︰「祝大家身體健康、開開心心、工作順利，拍拖開心、家庭開心，平平凡凡過一個美好人生。」

 

轉載自: 晴報

• 

第九屆「傳媒轉型大獎」請投etnet經濟通一票！► 立即行動