8月14日，無任何先兆，心臟病發，從鬼門關前走返上陽間，至愛親朋都話：「大步檻過，吉人天相。」

　　一點三，如常約咗老媽子飲茶，前往中途，氣促心翳汗如雨下，去到酒樓，毫無改善迹象，手腳冰冷麻痹，老婆心知不妙，堅持去醫院檢查。如果唔係大人當機立斷，我瓜咗啦，感恩一。

　　兩點正，醫院無急症室，登記門診期間，心口好似畀大石砸，口齒唔清，麻痹惡化，心電圖證實心肌梗塞，點知當日無心臟科醫生，須轉介公立。模糊間送上白車，忽接來電，原來大人緊張關頭，搵舊同學醫生幫忙，堅持原醫院做手術，已經聯絡咗兩位專科醫生，而家飛車嚟緊。如果轉院重新檢查，星期日未必有醫生掛單，過咗黃金六小時，就算唔瓜，心臟細胞肯定瓜咗大把，救番都嘥藥費，感恩二。

　　三點七，入手術室，六點九，完成。醫生話三條心臟血管，一條塞咗百分百，一條97％，一條98％，危險到極，通完波仔，放咗六個支架，送去ICU觀察，咁都唔死得，而家行得走得精神過乜，感恩三。

　　七點九，接駁心電機驗血打點滴聞氧氣，安排妥當，大仔見我軟攤在床，餓到失魂落魄，二話不說，拎起匙羹，攞起兜粉，第一次餵老竇，佢一啖我一啖，未食過咁正嘅肉絲通粉，兩個仔全日陪伴在側，心好甜，感恩四。

　　做人好化學，生死控制唔到，專欄都講過：「我怕瓜，瓜咗，見唔到老婆。」估唔到差啲應驗咗。自問光明磊落，對人都算幾好，就係對自己唔好，唔識愛惜身體，唔鍾意瞓覺，我知錯啦。多謝同學、兩位醫生、十幾位手術室ICU護士，無你哋，我見唔到聽日。

　　唯一遺憾，手術完咗，問姑娘：「我老婆呢？」「做咩？」「想錫佢一啖，令佢擔心，講聲對唔住。」「遲啲先啦。」

轉載自: 晴報

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票