「遙遠的東方有一個灣，她的名字就叫珠江灣。」融合大潮又來了，今次大陸用嘅term，就叫粵港澳大灣區，又或者有個長啲嘅──「香港最後一個發展的機會」。中央旨意打到嚟，港九新界無得避，自李克強喺三月兩會時發表嘅總理工作報告，提到「粵港澳大灣區」嘅概念之後，政府就不停推銷呢個國家級發展戰略。 

　　睇返以往幾十年，珠三角一帶都有唔少嘅戰略term出過台，由回歸初期嘅「大珠三角」、到胡溫時代，張德江主理嘅「九加二」(九個廣東省城市加香港同澳門)、以至6年前靜悄悄的來，靜悄悄的無咗嘅「環珠江口宜居灣區」規劃，講到尾，就係珠三角應該係一個融合經濟體，並為國家嘅發展提供強大助力，為建設十三五小康社會，以及圓滿習近平主席的中國夢作為強力後盾！嘩，多麼偉大，多麼神聖的發展規劃啊。唔少有涉足商界嘅人，對呢個計劃同充滿冀盼，亦認同「最後一個發展機會」呢個「警告」，覺得如果香港再唔聽話，跟隨國家嘅大勢，未來一定無啖好食。 

       今日，冷手執個熱煎堆嘅謬波，呼籲香港老人去粵西過退休生活，或者去恩平浸溫泉唔使去日本關西， 表面上係捉錯用神，勸錯隔離，喂而家人哋同你講緊做生意，你做財政司你走去講去玩去食？其實，佢呢個「呼籲」嘅本質，就係話你聽，政府唔提倡跨境體會別國文化，反而應該考慮一啲連個溫泉係真定假都未分到嘅「短線」遊。如果返大陸生活係咁好嘅話，不如港府官員先做個示範，返大陸住，然後運用「一小時生活圈」呢個「優勢」嚟往返中港兩地。

　　有關大灣區係「香港最後一個發展的機會」，內地嘅評論點解咁強調係「香港」呢？因為對大陸嚟講，香港並唔係一個合作對象，只係國家發展嘅一隻棋，呢隻棋到今日嘅價值，仍然係有「自由」、「國際信任」、「具國際水準嘅專業服務」，呢啲字刻喺上面，呢啲係大陸發展咗幾十年，都烹調唔出嘅材料，喺中長期政治封閉嘅情況下，都唔見得會有咩起色，香港呢啲「剩餘價值」，就令到大陸唔能夠完全棄棋。但偏偏，抱持住以上呢啲價值嘅香港人，就係最唔想屈服於政權之下，所以，點解又咁強調係「最後」機會呢？靠嚇囉，唔講得大啲，點令到香港人屈服，全面投誠，順應國家？ 

　　一定有人覺得，我又政治化咗呢個規劃啦，「而家係國家益緊香港呀，邊個反對就係令香港再無得起飛」。個人嚟講，我認同香港自從被大陸收返以嚟，係喺度食緊老本，錯失咗唔少機會，包括冇得實現一個無得事先知道結果，真正由人民決定嘅首長選舉、冇得利用香港金融市場嘅自由度，去推動人民幣真正嘅市場化、冇得以香港回歸前可靠嘅廉政制度，畀大陸官場有一個廉潔嘅楷模。反而，因為大石責死蟹，香港一直喺度妥協，連反抗嘅權利都一步步咁被剝奪。民主、自由、廉潔呢啲軟實力，廿年嚟一直被擠壓。大灣區計劃，口講係要好好運用各地區嘅「獨特優勢」，但最後，對於國內只能夠成為刺激GDP嘅最後稻草，對香港就會成為壓逼妥協嘅代名詞。

　　當大家睇見一班所謂法律學者，今日會搞講座，逐條討論點樣將香港嘅《基本法》「釋法」，完全只顧大陸想點做，就知道融合只係幌子，砍掉重煉先係大陸對香港最想做嘅嘢。當融合變成吞併，國際唔再認可香港嘅價值時，香港就變成雞肋了。只係想守護香港僅餘價值嘅我哋，應該如何是好？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情