濕熱亞馬遜 踢到發晒燒

　　過去兩日去咗巴西最北嘅比賽城市瑪瑙斯，見識咗亞馬遜熱帶雨林嘅威力，長時間又濕又熱嘅一個小城市，隨時可以送世界杯任何強隊一程！

 

外來球迷途長路遠通常得小貓三四隻，英格蘭例外！

 

　　其實我哋香港人都可以話係濕熱天氣專家，三十幾度唔係話頂唔順，但當加埋一個濕字，就真係「四眼蛇都變大懶蛇」，唔郁就係最好嘅自保方法！

 

　　昨晨英格蘭負意大利1︰2呢場「死亡D組」大戰之中，兩隊借頭借路出場邊飲水嘅畫面，隨時多過射門次數，其實人道啲嚟睇，應該暫停場波齊齊灌水，球證自己都應該飲埋一份。

 

　　原本響瑪瑙斯嘅四場賽事都係下晝開波，但每一隊去過現場實地考察之後，都耍手擰頭一定要太陽落山先肯開波，所以家陣咁多場都改晒響黃昏六點踢，大會算係從善如流，如果唔係搞出人命就無謂啦。

 

　　之不過我仍然相信幾隊要響度踢嘅歐洲隊，將會非常唔暢快，有邊幾隊？咪就係瑞士，克羅地亞同C朗拿度壓陣嘅葡萄牙！究竟超人C朗會唔會都有「索氣」瞓地嘅一幕呢？

 

　　今屆暫時幾組嘅賽事之中，都係大旺美洲球隊，原因起碼有兩個，一係地利，二係人和。地利易明，人和亦大家有眼睇，美洲隊隊都大班fans，相比起其他洲份嘅fans小貓三四隻，咩叫做「半個主場」，就係咁解。

 

轉載自晴報

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情