愈近選舉，「黑」氣愈來愈重。有候選人被爆「無相無片」嘅桃色醜聞，亦都有報章大肆報道有功能組別選民有組織地「過組」。各式各樣嘅黑材料都有，爭在係有幾「黑」。昨晚最「黑」嘅一單，就係由新界西自由黨候選人周永勤爆出。佢喺一個電視選舉論壇之上突然宣布棄選，仲話「唔想我身邊支持自己的人惹上較高層次的麻煩，或者係付上代價」。佢最大指控，就係收到一段錄音，入面有人話要搵幾十人去狙擊佢，等佢無心機出席論壇，而錄音入面亦提到另一名候選人、獨立嘅何君堯嘅名稱，而何君堯自己已經承認錄音的而且確係來自佢地競選團隊嘅義工。

　　另外，上周仲有周刊引述周永勤報道，有人以一倍選舉經費金額，問佢可唔可以退選。周刊又引述消息稱，有人先後以官位同500萬元利誘，問周可否退選，以力保選票集中流向何君堯身上。

　　成單料嘅Juicy程度真係爆晒燈，特別係因為建制派較少出現呢種公開內鬥。周永勤同埋何君堯，兩人同鄉事關係真係千絲萬縷，較為直接聯繫，係周永勤做過「新界王」劉皇發嘅競選助理，而何君堯同發叔嘅牙齒印更加係多到手指都數唔晒，最經典就係何君堯成功推翻發叔屯門鄉事委員會主席呢個坐咗幾十年嘅「王座」，之後何更想直搗黃龍，連屯門區議會主席一職都撈到手，最後都係發叔運用影響力壓低佢。

　　喺呢堆牙齒印背後，好難想像周永勤棄選聲明嘅舉動，唔係想同何君堯「攬炒」，但成件事背後肯定唔會單單係表面睇咁簡單。用普通人邏輯思維去分析都明白，如果周真係受到好大「壓力」而妥協唔玩選舉，最好就係唔再出聲、唔再出席競選活動，無聲無色咁等9月4日；如果佢不甘受壓，就好應該實名舉報，繼續參選。偏偏佢選擇嘅最耐人尋味嘅方式引爆呢個炸彈，何君堯被燒到遍體鱗傷，隨時搶唔到議席，而周自己？支持度亦難以大幅提升。

　　咁成件事邊個最得益？我仍然覺得係周永勤，試問有幾多選民之前有留意過呢位候選人？搶唔到議席都起碼搶到名聲。

*編者按:2016年立法會新界西選區候選名單包括:1.黃潤達、2.尹兆堅、3.高志輝、4.周永勤、5.鄭松泰、6.鄺官穩、7.田北辰、8.何君堯、9.梁志祥、10.郭家麒、11.黃浩銘、12.李卓人、13.黃俊傑、14.麥美娟、15.馮檢基、16.陳恆鑌、17.張慧晶、18.呂智恆、19.湯詠芝、20.朱凱迪。　

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇