【是非源頭】因為1個茶水間姐姐退休，搞到公司同事集體劈炮唔撈？！

　　最近pantry姐姐因為抱孫，提早退休，返屋企幫手凑孫享天倫之樂！但事出突然，HR失驚無神要係一個月時間內尋覓新姐姐，日日叫苦連天。要知道，假如一間公司冇左姐姐，成個pantry就會冇人執，鋅盤堆滿食物殘渣、水積周圍都係、外賣垃圾冇人清、guest重用上手用完未洗嘅杯、連信都冇人寄！天啊，只係想像，就知道冇咗姐姐大家會幾大穫。不過，HR好快手就搵到新姐姐，只係…「要請人唔難，但要請個合適嘅人就好難」。最終，一個正常的姐姐走了，但多個office同事都一齊辭職走人！

 

 

　　大家本來對於pantry姐姐呢個位，都冇咩要求，但求有人幫手清理就得，所以HR係有限時間下，成功請到新人姐姐－亮姐，我地就心滿意足。因為pantry姐姐呢個變動對大家嚟講，影響實在太細，所以大家見有新姐姐上任，就同平時一樣咁做野。點知，唔同部門嘅同事，開始慢慢收到warning letter，而且人事變得複雜，更加有人開會時俾同事公然針對！

 

 

　　公司氣氛、人事問題變得惡劣，唔洗問，問題緊係出左係唯一嘅轉變－主角亮姐身上喇！就係因為大家對「姐姐」呢個職位太習以為常，換左新姐姐後大家都如常生活，包括係女廁或pantry講是非等等，結果姐姐以是非換人情，將大家嘅對話講哂出去！最可怕嘅係，亮姐呢個人，多咀都算了，將所有是非同秘密都講出去，但佢竟然唔用腦，將「講者」同「被講者」都講埋出去！其實你估佢地平時唔知對方唔妥自己咩？只係職場上冇爆獲嘅話，點都要保持個偽君子嘅樣咋嘛！但而家亮姐就好似將一個個大家好努力出賣自己去埋葬嘅炸彈掘出嚟引爆。「喂，個個都知佢唱我喎，唔係仲要對住佢烚熟狗頭咁嘅樣嘛？」最終，咪發展到大家嘅不滿上哂水，做事公私不分，針鋒相對，難為其他人要睇佢地面色。

 

 

　　另外，有時大家想偷個雞、休個息，甚至提早收工去睇醫生，好多時冇爆獲咪隻眼開隻眼閉囉。但又係亮姐呢個好事多為嘅人，硬係鍾意同team head通風報信R水吹，將大家早走嘅記錄講哂比team head知，又係果句，你講到咁明我唔做野都唔得啦。所以咪個個中招瘋狂收HR嘅warning letter囉！

 

　　呢個人事調動證明左：其實公司每一個員工都真係好重要架，而且影響力極大，HR一個唔留神請左啲唔合適嘅人上船，輕則人心惶惶、破壞員工生產力；重則人人跳船，公司嚴重欠缺人手，做到仲留底嘅船員自殺都冇時間！

 

　　求吓亮姐你快啲退休喇！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇