【一凹一凸】當「道歉阿姐」遇上「卸膊阿姐」，等於玩死班下屬！

　　當你以為黃曉明和Anglelababy是史上最合襯的配搭，但原來辦公室內有一對比金童玉女更合襯的組合，就是永遠甚麼事都承認責任再道歉的阿姐，和甚麼事都推卸責任維護自己的阿姐。一凹一凸合作本應該天衣無縫，但二人下面仲有班細嘅，卻因為兩位凹凸阿姐變到水火不容、鬥個你死我活。

 

 

　　先講講兩位凹凸阿姐的特點。道歉凹姐：有理冇理乜都攬上身，係咪都道歉咗先，驚死人會鬧佢獲甘咁；你錯晒凸姐：一出事即刻起「鋼」，維護自己Team，企圖將個穫完完整整咁拋被別人。兩位分別係兩條Team的阿姐，而兩條Team負責嘅嘢環環相扣，由「你錯哂凸姐Team」處理完，再直接Pass「道歉凹姐Team」！所以有咩大件事，兩條Team都可能會有責任。

 

　　一次， 一個凹姐Team嘅小薯被召喚到凹姐間房。

 

 

　　「點解批貨唔係分開半份半份咁去pack？變咗一份份咁pack？你知唔知好大鑊？比B姐（凸姐）同上面鬧咗好耐！我道歉左幾耐！」 

 

　「下？我跟足佢哋send出嚟嗰個PowerPoint做喎⋯⋯」 

 

　　「點都好，每次做嘢之前學下同佢地check真先好做！」 

 

　　小薯突然俾人照肺梗係唔憤氣，返埋位check返凸姐Team send 出來的email。然後反覆問自己：「我跟足佢地做嘅野去做都唔啱？如果連佢地send出嚟嘅野都要我再三confirm先可以做，佢條Team要嚟做乜？佢地所有email亂打都得啦！一定又係凸姐砌我地生豬肉！」之後，小薯就私下搵個岩咀形啲嘅凸姐Team小薯問下究竟發生咩事⋯ 

 

　　「我想問個project跟powerpoint去pack，邊度出咗問題？」 

 

　　「吓？冇問題啊？」 

 

　　「咁我地Team又比人鬧嘅？」 

 

　　「比邊個鬧？鬧咩啊？」 

 

　　「你阿姐同大粒野囉，好似話好甘添喎！」 

 

　　「有啲咁嘅事？冇爆獲喎，冇人鬧過喎⋯⋯」

 

 

 

　　到頭來，真相終於大白！隔離Team只係同凹姐提過將會有批貨半份咁pack，而凹姐又唔知點解理解咗為：自己人做錯事，而家比人鬧緊。即刻向人道歉之餘，仲秒速怪罪落個小薯身上。小薯除咗嬲爆之外，都冇野可以做到。但佢諗極都唔明，點解阿姐理解能力咁差都做到阿姐。點解人人避開的「爆獲」，佢反而統統攬哂上身！如果佢唔係有朋友係隔離Team、知道事件嘅來龍去脈，佢一定會以為係凸姐Team畀陷阱佢踩，視人地為敵人！最終，佢發現原來敵人竟然係自己Team嘅阿姐！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票