冇得「馬照跑」喇！50年不變提早玩完？

　　Mola！Mola！冇得「馬照跑，舞照跳」喇！事關同一向惹火嘅立法會議員何君堯，佢嘅愛駒「天祿」本來18號晚喺跑馬地馬場出賽，仲要跑頭場，網民見狀就「贈慶」發起圍堵馬場；馬會就話，基於安全原因，決定取消所有賽事！一眾馬迷牙痛咁聲，皆因冇咗個發財機會，不過Jenny一班唔賭馬嘅姊妹就拍手叫好，話可以遏止賭風喎！

 

 

 

何君堯惹火 馬會「攬炒」

 

　　何議員自從喺721事件入面同「白衫人」握過手之後，就更加惹火，唔止佢一舉一動備受網民關注，而家連佢名下愛駒「天祿」動向都關心埋一份！話說「天祿」原定出戰18號晚舉行嘅頭場草地1000米賽事，由騎師田泰安執韁，告東尼就係練馬師。網民知道，即刻就話要去馬場「賀一賀」佢！咁搞法，馬會即刻心驚驚，梗係啦！你只係嚟嘈吓唔緊要呀！但如果有雷射筆就可能嚇親身價不菲嘅馬仔，如果警察出動就可能出催淚彈，寶貝馬仔吸到啲啲都大件事呀！仲有一眾達官貴人呢，唔受得任何衝突場面架麻，嚇親點算先？

 

　　所謂解鈴還須繫鈴人，咁叫「天祿」退賽咪一天光晒囉！唉！少年你真係太年輕，事情邊有咁易解決吖！Jenny聽到唔少傳聞，包括有人唔肯退出、程序上有限制等等，但都未能夠Fact Check到，所以唔詳述喇！總之，馬會最後決定「攬炒」，取消18號晚所有賽事，佢地同Jenny講，話係因為關注到而家呢個咁嘅環境，跑馬地附近地區或會發生不可預計嘅混亂情況，馬場甚至可能出現暴力場面，加上附近一帶交通存在不確定性，所以做出咁艱難嘅決定，對此都感到好無奈呀！

 

回歸後首次因政治原因取消賽馬

 

　　Jenny 翻查資料，如果冇數漏，今次應該係香港自開埠以來第4次因政治事件取消賽馬，第一次係1925年省港大罷工；第二次是日本佔領香港時期，第三次係六七暴動。如果計回歸之後呢？就真係第一次喇！當年，前國家領導人鄧小平話過回歸之後「馬照跑，舞照跳」，家下點知一個修例風暴刮埋嚟，冇馬跑了！你話世事幾諷刺呢！

 

　　嗱！2017至18年馬會本地賽馬淨收入有成47億幾，一季就大約90個賽馬日……小妹幫馬會計計數先，而家咁突然唔跑一日馬，分分鐘冇咗差唔多5億收入！而同年度，來自各項博彩稅同利得稅，Total為政府庫房帶來233億收入，即係政府都冇咁億幾兩億稅收啊！不過，其實馬會係可以申請補賽日嘅，之前打風都係咁做，但因政治事件取消賽事又可唔可以就咁話補就補呢？小妹都有疑問。

 

　　講返轉頭，何議員係馬主，隻馬又冇病冇痛，又唔可能無啦啦DQ隻馬，即係話「天祿」隨時都可以出賽……亦等於網民隨時都會出動，貿然又取消賽事，其他馬主今次接受，下次又會唔會仲接受呢？今次馬會真係唔知點拆先好喇！Jenny都戥馬會頭痛！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好