去大阪 入讀「哈利波特」魔法分校

　
　　英國傳統名校「哈羅」在香港開分校，港媽為仔女爭崩頭；大家唔使爭，今個暑假可殺入日本環球影城開設的哈利波特分校。學校剛在 7 月 15 日開課，小記已於上周先循神秘的魔法途徑，混入一班預先收到入學通知書的學生之中，率先闖入魔法世界為你「套料」！
　
30℃ 熱爆「冰凍」活米村
　
　　攝氏 30 度，穿着學院長袍，圍住學院頸巾，走在樂園熱到叫晒救命。來到我們魔法世界體驗的第一站活米村，卻洋溢着冬天的氣氛 ── 屋頂上鋪滿積雪，簷篷還有枝枝冰柱，即使實際氣溫無下降，但心理上好似涼咗！終於來到魔法世界，耳邊不停聽着 Hedwig's theme，即使眼前所有村民皆是東方人，講嘅都係日文，與電影差距較大，但各個連細節位都認真處理的電影場景建築，看得出花了不少心機（400 億日圓喎！），令我們忍不住到處打龍瞬間入戲。雖然日本版魔法世界比美國奧蘭多的少了一個最刺激的雙龍過山車，但其實對 fans 們來說，淨係玩晒影晒成個魔法世界，相信仍然走唔甩玩足一日。
　

魔法世界體驗的第一站活米村，裝飾睇落好凍，事實上烈日當空，加上人山人海，唔少舖頭都要排隊，cosplay 前往的粉絲們小心中暑。

「我哋最鍾意榮恩同鄧不利多，希望可以買到佢哋嘅魔杖啦！至於機動遊戲最期待都係《禁忌之旅》，想知道佢同 spiderman 邊個好玩啲。」 Aya & Tia。出沒地區：USJ 正門。

要降溫，一定飲奶油啤酒。奶油啤酒不含酒精，汽水加忌廉鋪面，為了迎合日本麻瓜口味，變得更易入口。普通膠杯裝約 38 港元，沙冰版約 45.6 港元。要拿回去紀念當然要點連紀念杯裝，約 76 港元。

三把掃帚是區內唯一餐廳，而相連着的豬頭酒吧除了賣奶油啤，亦有賣含酒精的普通啤酒。

　　
校前廣場 大鬥魔法
　
　　對於熱愛哈利波特的麻瓜粉絲來說，無論活米村有幾熱鬧好玩，都挑戰不到霍格華茲的重要地位，作為故事主舞台，實在有太多經典情節上演過。從第一集開始，相信睇過小說或電影的人都想像過自己有機會入內就讀，學番一招半式。而通過活米村的拱門，霍格華茲城堡就在眼前！咪住先，廣埸上響起「Double, double, toil and trouble……」咦，哈利波特中的經典樂曲《Double Trouble》喎！原來是青蛙合唱團的表演，由四院學生手捧着會唱歌、呱呱叫的青蛙們表演經典樂曲；之後又邀來三巫鬥法大賽的參加者 —— 德姆蘭及波巴洞的學生大跳絲帶舞及表演格鬥。每次表演都有大量觀眾捧場。
　

日本分校的獨特是奧蘭多分校所沒有的。日本有坐霍華茲特急去上學，又坐船渡過黑湖，在這裏可拍到日本才有的城堡湖水景色。

每次廣場表演約十多分鐘，從 Double Trouble 到 beatbox，皆是無伴奏合唱。　

園內有《鷹馬的飛行》機動遊戲，驚嚇度欠奉，屬合家歡貸色。

 　
魔法城堡 禁忌之旅
　
　　入學前，要先「套料」。問過幾位霍格華茲師姐師兄，大家都對魔法世界其中的機動遊戲《哈利波特禁忌之旅》最期待，玩完嘅都話好玩到再玩過，這個重頭戲就位於霍格華茲城堡裏面！終於能夠進入對麻瓜來說的終極朝聖地，心情緊張！
　

等入校門前，可以近距離仰視宏偉的城堡。

 　
　　一通過鑿住霍格華茲校章的大門，我們的隨身物品就被要求放進 Locker，然後沿住上芽菜教授堂的溫室、經過學校走廊、肖像室、校長室、黑魔法防禦學課室等小說中重要劇情發生的舞台，慢慢行慢慢欣賞，從未試過排隊排得咁開心！最後才來到萬應室，和哈仔一起乘上「掃帚」冒險！
　

來到黑魔法防禦術教室，會見到哈利、榮恩及妙麗三人突然出現又消失，全靠哈利的隱形斗篷。三人討論走堂事宜，好一個典型學生會做嘅事！

來到學院走廊，有史萊哲林和葛萊芬多創辦人的金像。而守住校長室的石像鬼，通關密語通常是某種點心零食名。

通過肖像室之後，就來到校長室！儲思盆等道具都有忠實呈現，當然亦有鄧不利多同大家訓話。

進入交誼廳前，先過肥太太一關。

最後來到分類帽前，他會跟大家講一些有關勇氣的話，幫你為接下來的遊戲壯膽！

 　
　　坐上 4 座位的橫向移動吊腳式過山車，兩腳吊吊揈有如騎掃帚飛天，配合碗形投影器製造無痕 4K 影像，簡直親歷其景，跟住哈利飛上飛落！三巫大賽出現過的巨龍、禁忌森林的蜘蛛、催狂魔等等皆有出現，好似一次過重溫 4 集小說！喂！下一次，輪到你入學囉！
　　
排隊買哈利商品
　
　　不知是否想快點收回投資了的 400 億日圓，USJ 哈利波特魔法世界的商品普遍偏貴，但絕對動搖唔到一眾東方麻瓜入手購買嘅決心！排隊入「蜂蜜公爵」仲耐過排隊玩《禁忌之旅》，以「飛七沒收品百貨店」為例，畀錢至少排半粒鐘，你就知粉絲有幾癲。看看以下產品，你會有多心動？
　

各主角使用的魔杖，每枝約 266 港元。

學院袍約 836 港元，學院圍巾約 319 港元。

魔杖造型原子筆，一套 5 枝約 611 港元。

　　
　
潛入魔法世界 Tips
　
　　點拎到進入魔法世界的入場票？作為海外旅客，方法有 3 種。
　
　　1. 如有日本親友，可以請其幫你預先購買 USJ 的 3 種 Pass：Royal Studio Pass、Universal ExpressR Pass 7 及 Universal ExpressR Pass 5。前者最貴，但已連入場券，後者的 Express 7 是可以玩晒兩個哈利波特機動遊戲的 Fast Pass，最後的 Express 5 就只能快速玩到「哈利波特禁忌之旅」。但如果一心只打算玩哈利波特園區，放棄 USJ 其他區域的話，就建議只買 Express 票，毋須購買 Royal。3 種 Pass 都只能在日本購買，寄至日本地址，所以此方法只供有日本親友的粉絲選用。
　
　　　Royal Studio Pass：19,167 日圓 / 1,461 港元起
　
　　　Express 7：5,600 日圓 / 427 港元起
　
　　　Express 5：4,400 日圓 / 335 港元起
　
　　2. 不懂日語，又唔想煩買飛的朋友，可以選擇跟團或在旅行社購買自由行 Package。與 USJ 合作的旅行社，可在此查詢：www.usj.co.jp/hk/travel/。
　
　　3. 最後一個方法，則是入園當日在園內抽選不同時段的入場券。
　
　
日本環球影城
　
　入場費：1 日票成人約 531 港元，小童約 371 港元，2 日票成人約 894 港元，小童約 628 港元。
　
　時間：9am-10pm（每日不同）
　
　地址：大阪府大阪市此花區櫻島 2 丁目 1 番 33 號
　
　電話：+81 (0) 5 7020 0660
　
　網址：www.usj.co.jp/harrypotter/
　
　
旅遊 Info
　
　簽證：特區護照或 BNO 護照人士可免簽證入境日本，每次最長可逗留 90 日。查詢：日本總領事館 2522 1184。
　
　匯率：100 日圓約兌 7.6 港元
　
　氣溫：7 月大阪氣溫平均約攝氏 28 度
　
　機票：香港多間航空公司有多班航班飛往關西國際機場，來回機票 4,150 港元起，已連稅，查詢各大航空公司。
　
　住宿：在網址 www.hotels.com，可找到大阪住宿，京阪環球塔飯店每晚 708 港元起。
　

（文：茶、jo　攝：Suki）
摘錄自香港經濟日報

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇