【情債最難還】隔世離婚

　　情與怨，原來可以跨世嘅。

 

　　朋友高大企理，細心無比。但每次拍拖至談婚論嫁，總係甩轆！

 

　　佢第N次失戀之後，唔去搵戀愛顧問或心理專家，而係去搵靈媒。見面時，佢衹話睇運程，冇透露自己嘅傷心事。

 

　　「有個女人跟住你喎，我睇到佢。唔……村姑打扮，幾年青，仲有幾分秀氣㖭。」

 

　　佢覺得好詭異，就問：「咁奇？我成世都喺大都市生活，香港出世，英國讀書，現在喺大中華工作。會唔會係我去農村考察，或者去旅行時撞到呢？」佢問。

 

　　「唔……等我問吓佢先……佢話有一世你娶咗佢，當時你係大夫,好年青,又成日出門，去各地行醫，留番佢一個人喺屋企，結果因為孤立無援，俾村裏面D人謀財害命。所以就算你投咗胎，佢仍然跟住你，而今世每次拍拖，佢都會攪喎你，因為佢唔想你娶第二個女人。」

 

 

　　朋友自忖：「唔通真係有料到？我拍拖次次滑鐵盧，佢都知？」

 

　　正在半信半疑，靈媒講：

 

　　「佢話你唔信咩？今世你雖然冇行醫，但因為曾經精通艾炙之術，你今世成日無端端聞到燒艾草味嘅。」

 

　　朋友當堂彈起，因為佢從來冇向任何人提起此事，急問：

 

　　「咁點算呢？我嗰一世係犯咗疏忽照顧之罪（番書仔當前世老婆係寵物），但都係為咗行醫救人啫，你問佢我可以做乜嘢To make it up to her（補番數）？我燒啲iPhone、智能豪宅、私人飛機俾佢吖。」

 

　　「佢話佢攪唔掂呢Ｄ嘢,你唔好玩啦。呀！佢想你寫番份休書俾佢，等佢可以名正言順再嫁喎。」

 

　　「呢個 counter proposal好到痺，急急做！」

 

　　於是馬上寫，立刻燒。即時了斷。

 

　　世界上，情債最難還，我朋友好人好心，先有如此好下場，呢單隔世case，算係easy joy啦。其他人嘅多世糾纏，就恐未能善罷，可能攬炒咧！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！ ► 立即行動