【與樓有緣】靠男人不如靠磚頭？

　　愛，講緣；樓，也講緣。

 

　　朋友與男友拍拖五年，想找一個安樂窩，三年來看過不下百多個盤。但不是因單幢樓無業主立案法團、就是因即將大維修、否則就是業主反價、同層有凶宅、自己預算爆燈......等等原因，還是無殼蝸牛。

 

　　最近受了莫大刺激，五年青春、一泡眼淚、散了！竟然不顧一切，買了。

 

 

　　她屬羊，羊今年有天乙吉星，我年初告訴她今年可創業或置業時，她當時小鳥依人般盤纏著男友說：「買屋兼改姓就好咧！」點知咁快就玩完。

 

　　這隻羊並沒有跳崖，反而識搵塊靚草地。

 

　　「與其緬懷過去，不如計劃未來。分手嗰晚，我喊爆之後，即刻上網揀樓，跟住就開始忙到飛起，已經忘記咗傷心。」哈！治療情傷有創新方法。

 

　　她跟住非常亢奮地描述「買屋記」：

 

　　「間屋250呎，十八年樓，盛惠五百零八萬。你唔好話貴。大坑靚區嚟喎。仲有第十一區校網，好搶手㗎。我睇過同區新樓，成千萬呀！不過當然好精緻、有會所，咁計起上嚟呢間半價咋！」

 

　　「又俾你執到？」

 

　　「都係要多謝辣招、業主有幾層樓，每個仔女一間，嫌呢層太細，要急賣，騰出個名嚟買間大嘅。一擺上網就俾我昅到。」

 

　　「咁你咪分手得好合時！」

 

　　佢冇打我，反而繼續high！

 

　　「係囉。有人出五百零五萬，我立刻加碼三萬，並連夜借咗個小姪女嚟助陣。」

 

　　「佢幾歲？咁好牙力？」

 

　　「佢先兩歲，帶佢去睇樓，好過搵風水師，哈哈，而且唔駛錢。有次我「的」埋佢去，佢一入屋就狂喊不止，後來先知道同層有凶宅。」今次佢去到呢間屋，好開心咁唱歌跳舞，所以我即刻扑鎚。」

 

　　如果個個都好似佢咁，用「嬰孩驗樓法」，Ｄ風水先生真係要食西北風、飲冷開水咧！

 

　　桃花運謝了，置業運即來，真係時間啱啱好。所以呢！女人當自強，買番四幅牆，如此則想拍可拍，想宅就宅。

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情