以為秒速攻心，究竟係高智定低B？

　　網上流傳不少高效能、低成本嘅「好蹺」，話1秒鐘影響人對你嘅睇法，可以扭轉乾坤、極速窩心，甚至係要錢有錢、要人有人！

 

　　我想指出有啲所謂絕招，好可能係會backfire、弄巧反拙。

 

　　證誤如下：

 

一、追女仔最快嘅方法，係一齊去坐過山車

 

　　我估論據係：個女仔嚇到魂飛魄散，見到你定過抬炸彈，梗係覺得你好man啦！我就認為係險招，曾經有個男仔想討好我，自告奮勇陪我坐，點知原來過山車不只向上衝，仲會倒轉落，佢嚇到落車時條褲濕咗，英雄當堂變咗狗熊。我仲man過佢！

 

 

二、不斷叫人個名，可搏好感

 

　　呢招係sales嘅慣技，佢一問完你個名，立刻潮水式呼喚你。因為sales嘅訓練，都係話客人最高興聽到自己個名，因而對記得佢名字嘅人特別容易解囊奉獻。其實已經有好多人用呢招，變咗太濫。你不斷叫我個名，只會令我覺得你煩。佢哋咁密集式重複，另一原因係因為想記住，其實有第二啲好用實用嘅記憶方法，就如聯想法，例如有一日銀行有兩個職員打電話嚟為我補飛，我當時喺條街，未記綠低佢哋名字，腦中立刻自己作嘢：佢地一個姓周、一個姓李，我就以「服務周到，完全為你」作提示。以後都記得佢哋姓乜。

 

三、模仿對方動作，可極快縮短距離

 

　　呢招係NLP（Neuro-Linguistic Programming）嘅熱賣招式，原理係人類對與自己動作相同嘅人會極速產生好感，此招喺罕為人知時的確有效，但當mirroring成為公開秘技時，潛意識變咗顯意識，已經失咗「攻其無備」嘅作用，而且要應用得唔低B，有難度！

 

　　所以見到網上流傳嘅致勝攻略，唔好生吞活剝，以為現炒現賣，效用好大，其實喺一啲 Sophisticated嘅層次，反而顯得弱智。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動