【男女攻防戰】維繫感情的最好方法：識做、禮貌、激情與放生？

　　現今嘅男人真為人設想，有錢就多照顧幾個女人，怕女人捱苦！

 

　　現今嘅女人就更將心比己，發覺男人窮咗，就自動消失，唔想男人有太大壓力！

 

　　男人都咁識做，邊個話中國唔係禮義之邦吖？

 

　　抑或係兩姓都進化咗呢？

 

　　以下故事嘅女主角唔知算唔算識做，但肯定有禮貌。

 

　　朋友話老婆以前成日當佢係沙包，於是出錢畀佢去學跆拳道，等佢有地方發洩一下佢嘅Pent-up energy。

 

　　老婆上咗跆拳課之後，真係好咗喎－打佢之前，會先鞠個躬！

 

　　有人認為：打者愛也，麻木先係最傷嘅。

 

　　經過三十年，一對夫婦嘅婚姻關係已經甩甩地轆。老婆成日投訴：

 

　　「老公，你淨係玩手機，都唔理我嘅！」

 

　　老公心想：「玩手機好過玩你，反應好好多。」

 

　　繼續與手機談戀愛。

 

　　後來畀老婆哦得多，兩人一齊去見婚姻治療師。

 

　　老婆當然好澎湃咁形容不滿嘅浪潮，例如已冇咗愛嘅感覺、性嘅樂趣（其實係冇咗性）、冇咗存在感……。佢好流暢咁數咗半小時之後，治療師開始發功咧。佢請兩人企起身，自己就走到女人面前，突然熊抱狂吻咗一分鐘，女人唔知發生咗乜嘢事，男人更不知所措。

 

　　治療師就同男人講。

 

　　「嗱！呢招就係治療你婚姻嘅第一劑藥，要咁激情浪漫嘅，每星期最少三次，得唔得？」

 

　　老公回答：「星期一同五我都可以揸車送佢嚟，但星期三我放假，去打高爾夫球噃。」

 

　　假期有分長短嘅。

 

　　阿明平日好慳，已到寒酸程度，但最近衣著潮咗、食嘢豪咗，由35蚊嘅特價快餐，躍升至135蚊嘅壽司商務餐，放工唔再迫巴士，而係叫UBER。

 

　　同事作多方面猜測，以為佢中咗六合彩，原來只係同佢嘅大駛女友掟咗煲，重獲新生。

 

　　男女之間，除咗緣同債，仲有瀟灑假期。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇