「你盤生意得唔得？」幫759阿信屋計下數

　　數字係好現實，永遠唔會講大話，你可能有時唔太鍾意佢，因為佢成日都好活生生咁話你知「你盤生意唔得」。要創業，就要懂得計數，數口仲要好精，創業者自己同時間係sales director 亦係 marketing director，sales係賺錢，marketing係洗錢，要經常將兩者一齊討論取之平衡，避免marketing 出現一啲好勁嘅idea，但其實唔賺錢，從而增加創業勝算。簡單數學計算開業成本、來貨、租金、人工等固然重要，但如果要長線賺錢，不同層面、長／短線嘅計算亦不可忽視。而第一樣必要學習嘅數學，必定係計「平均賺錢速度」，亦可以叫「返數率」。講數學公式怕大家會訓著，等我用以下例子簡單說明。

　　759阿信屋為例，2010年創業，於2015年10月嘅中期業績中指出，佢哋嘅零售業務當時有281間759阿信屋分店，大約賺$2215萬，每$100生意中約有$1.9蚊收入。轉個角度睇，數學啲去量化呢件事，以281間分店計算，每間分店每個月大約賺$13000蚊，即係一日大約有$400幾蚊收入，當佢一日開門12個鐘，扣哂所有成本後每一個鐘約有$36蚊收入 (拍得住最低工資)，再除一除$1.9，即係要做約$1800蚊生意先有$36收入，如果一包薯片係$20蚊，一小時內要賣出90包薯片，即係每一分鐘都要賣出最少一包先可以keep 倒$36收入。 當然啦，呢個只係純數學計算，有好多因素冇計算在內，例如唔同地區店舖人數有異、weekday同weekend人多人少、一包薯片有平有貴等等。但簡單拆局後，已經發現問題。

　　講到好似好複雜咁，仲以為係度講緊股票。轉返去從marketing角度去睇呢件事，眾所周知薄利多銷係阿信屋嘅賣點，但如果做$100蚊生意先賺得$1.9，profit margin較低，「返數率」太低，防守性變得相當弱，以一間上市公司嚟講，策略上有啲問題。如果公司係打「紅海」策略，以平價吸引顧客，其實好難長線都係依靠呢招做生意，好大風險。因為成本定價受好多因素影響，例如來貨、匯率、租金、通脹等等，只要以上每件事比上年貴咗少少，果$36蚊一下只就可能得返$6蚊雞。

　　唔係話打紅海策略唔啱，而係打紅海時要記緊時時刻刻都要計住條數，從數字中搵出玄機，係適當時候轉型。所以計「返數率」係其中一項好重要嘅事，由其係零售業、飲食業、服務業等更為重要。唔同公司、唔同行業嘅計算方法可以好唔同，focus 嘅角度亦會好大分別，亦要就住公司唔同時段嘅發展作出方向上嘅修定。計好盤數，除咗能夠了解公司賺錢能力、控制各項成本之餘，亦可以為定下每年KPI，有條理地去跑生意、營運業務。

　　成日見公司啲老細連廁紙都計住哂嘅時候，你就明白計數嘅重要性。創業做老細，首要條件就係對數字要好敏感，要計金錢，要計時間，每一刻都係數字遊戲。計數就係要時刻警惕自己，別高估咗自己，低估咗市場。（創業的通病之二）

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【雙11感謝祭】雙重優惠、多買多賞► 了解詳情