【做生意必學】教你分清乜係代理商同經銷商

　　喺80-90年代，有好多日本產品打入香港、台灣等其他亞洲市場，產品主要係電器、家具用品、電子零件等等，當年因為日本產品質素較為好，而且款式新穎，所以好多地方對日本產品有一定嘅需求。江湖傳聞，以前日本品牌公司搵分銷商／經銷商好有自己一套嘅做法，佢哋經常會喺同一時間、同一地方搵好幾間代理商同經銷商，製造出「代理商與代理商」／「經銷商與經銷商」之間非常大競爭嘅局面，價低者得，自己人打自己人，令本地公司營利大減，而佢哋就能夠確保利潤，「un」「un」腳等收錢，呢個做法當年喺其他國家嘅品牌公司較為少見。

 

　　「代理」、「經銷」等等呢啲商業名詞，日常生活成日聽到。不過，聽咗咁多年大家都可能未必知有乜分別，感覺好似差唔多嘅事情，但其實又好唔一樣。代理、經銷等等嘅營銷模式，並唔係乜嘢新事物，亦唔係啲好高深嘅事情，但近年網上營銷盛行後，呢啲營銷模式慢慢被忽略。可能有時大家唔覺，其實分分鐘你身邊都有朋友係經銷商，亦有啲品牌公司主動會聯絡一啲做得較為成功嘅個人網店，提出代理／經銷等等嘅合作關係。

 

 

代理商

 

　　簡單嚟講，代理商可以話係品牌公司喺該地區嘅代表，係品牌公司同市場之間嘅中間人，代理商可以代理單一品牌或者多個品牌。通常品牌公司會比Commission代理商，搵佢哋幫公司嘅產品打進本地市場，亦會幫手處理唔同業務上嘅事情。而代理商多數需要比按金品牌公司，又或者相方都會訂立一啲合作協議，平衡相方嘅利益。有啲代理商同時會做埋銷售商嘅角色，佢哋要向品牌公司承諾一定嘅銷售數目（食貨），從而獲得代理權或Commission等等。當然，亦有好多品牌公司唔一定會搵代理商幫手打入本地市場，反而自己直接接洽經銷商或唔同銷售渠道，慳返比代理商Commission嘅費用。

 

 

經銷商

 

　　經銷商同代理商唔同，經銷商要比錢同品牌公司買貨，之後再經不同途徑賣返出去，而佢哋就賺取中間嘅差價作利潤。基本上經銷商主要角色係買貨出貨，某程度上同品牌公司嘅關係較為簡單。而經銷商出貨嘅定價較彈性，如果經銷商夠牙力的話，食水可以好深。但有利亦有弊，大部份經銷商入貨量一定多，相對嘅風險亦較大，如果銷售情況唔理想的話，就會搞到自己一手「蟹貨」。

 

　　近年數碼世界上亦有類似代理／經銷嘅營銷概念，甚至將呢啲概念改變，發展出新嘅生意同營銷模式。數碼媒體不停地改變世界，喺改變嘅初期，好多新事情都係由舊有嘅東西改變少少、進化少少，從而衍生出新事情。只要大家能夠融合新舊東西，就能捉緊數碼改革前期嘅商機。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇