【網紅不易做】先找出自己「Key」、「Opinion」、「Leader」的能力！

　　而家只要識打字拍片、識用facebook／Instagram，人人都話自己係KOL（Key Opinion Leader）。但可惜嘅係，近年好多所謂KOL嘅朋友，未必個個都有opinion，更談不上係key opinion。好多人會覺得只要夠多like 就係KOL（好似係），對比起KOL呢個名字，國內稱之為「網紅」好似更為適合。其實要真係做到有 key opinion，唔一定係當中嘅佼佼者，但起碼要有自己一套嘅見解，真係親身、真心嘅「用家」，發表嘅建議先有力。

　　英國有五兄弟姐妹喺2013年組成KOL團隊「KidToyTesters」，開始咗佢哋YouTuber事業嘅第一步。五兄弟姐妹年紀由3歲到15歲，最初佢哋媽咪喺2013年4月，幫當年只得4歲妹妹Kimi拍咗第一條玩具試玩片，小朋友可愛嘅演出令片段喺短時間內已經有幾千人收看，其後姐姐 Yumi、Sachi加入，第二條YouTube片已經有超過 16萬人收看，而首年最高嘅YouTube片收看人次更錄得超過 77萬人次，其中2015年嘅一條YouTube片更創達最高3千8百萬收看人次。

　　YouTuber嘅廣告收益因人而異，YouTube會因唔同嘅程況、YouTuber嘅類別等等而給予不同嘅收益。每千人收看人次（CPM），YouTuber大約會收到 1蚊美金到 5蚊美金不等，如果以呢個CPM計算，KidToyTesters 由2013到今日為止，已經收到超過1百萬至5百萬港元嘅收益，外國更有網頁計算器估計佢哋有高達1千多萬港元收益。再加上無數玩具商嘅贊助同廣告，佢哋嘅收入非常可觀，真真正正係寓工作於娛樂。

　　雖然呢個數字好似好驚人，但要做一個成功嘅KOL絕對唔係一件易事，最少你要有「Opinion」。呢句話好似好廢，其實KOL嘅opinion係出於一件好自然嘅事，就好似KidToyTesters為例，大人買玩具畀小朋友玩，件玩具好唔好玩，多數都係由家長本身嘅觀點出發，而忽略咗真正嘅用家「小朋友」自己本身嘅諗法，加上當年市場上冇乜同類嘅KOL／YouTuber，所以KidToyTesters 嘅成功就變得好順理成章。

　　近年愈來愈多小朋友加入KOL／網紅呢個行列，早年我成日講，「KOL／ Celeb-preneurs」呢個名詞喺由一班大人打造而成，但到今時今日要改口，因為除咗大人之外，小朋友、狗仔、甚至係一件玩具公仔都加入咗呢個行列，而KOL／網紅更有年輕化和老年化嘅兩極趨勢。所以不論你係以乜嘢型態、身份、年紀加入呢個行列都好，如果要成功成為一位真正嘅KOL，最重要係搵出自己有乜opinion、搵出自己「Key」、「Opinion」、「Leader」嘅能力。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》說說心理急救：遇危急事故應如何面對？點樣正確提供情緒支援？講錯說話容易造成二次傷害！► 即睇