【一年容易又annual review】3招幫你向腦細講出心聲！

　　打工仔每年最期待已久嘅日子「annual review」，當你行入老細房時，都會因為緊張同埋無做足準備，而失去一個表現自己嘅機會。可能你唔覺，同老細做review都有好多唔同嘅策略，懂得攻守兼備先唔會令自己過去一年嘅努力白費。其實好多喺review內要表達嘅事情，如果直接講出嚟的話可能會有反效果，所以幾時講、用乜方法講，都真係要諗過度過。以下有三個打工仔經常遇到嘅迷思，你哋又有冇遇過呢？

 

「如何表達你有幾辛苦？」

 

　　某程度嚟講，每年嘅review都係一個好好用嚟「攤牌」嘅機會，攤牌嘅意思唔係叫你同老細反枱，而係要透過今次review令佢更加了解你。公司出現斷層係好常見嘅事，就算冇斷層問題，好多時老細都唔會太了解下屬嘅情況。同事／自己OT有幾辛苦、食咗幾多死貓、為公司有幾落力等等，其實下屬都有責任反映比老細知，等佢知公司問題所在同埋真實情況。要做到呢點其實係要有啲技巧，如果直接講出口話的話，其實係好低手嘅做法。高手做法係，先從公司嘅角度做出發點，話比老細知你觀察到公司出現問題，從而令到同事受苦、生意受損，再用自己親身經歷講出你嘅諗法同改善方案。咁樣做一來唔會太hardsell，二來仲可以表現到你有「老細思維」、有觀察力。大多老細都非常受落呢啲「文字藝術」。

 

 

「幾時開口講人工？」

 

　　好多人入房同老細做review時都會好心急、好緊張，一來因為唔想對住老細太耐，心急想快啲搞掂快啲離開，二來打工仔最關心有冇得加人工、加幾多，所以好多時一心急起嚟，就會喺review較前段嘅時間衝口而出，提問有關加人工嘅問題，令老細反感，畀佢覺得你只懂向錢看，而唔係真心想做好工作。正常情況之下，review最先會傾談過去一年做成點點點，之後就展望來年要點點點，最後做埋個總結先會傾人工問題。雖然好多時喺你做review 前，老細對加薪早以心中有數，而入去傾可能都只係一個儀式。不過儀式還儀式，如果你肯表演自己，令佢更加了解你，可能因為咁來年賦予你一個重任，從而影響你今次加薪嘅多少。所以薪問題最好最後先講，加強你嘅攻守能力。但有一點一定要注意，好多人會怕尷尬而唔開口，任由老細決定，咁嘅諗法係好錯。記住，除咗你自己之外，冇人會著緊你有冇得加人工，就算你直屬上司話會幫你同老細fight，但fight 唔fight 到，佢最終都未必會太care。所以如果你怕尷尬而唔出聲，往後果一年你一定唔會好受。

 

「加薪幅度點樣定？」

 

　　好多人都唔識得定價，唔知道加幾多先叫合理，但其實定價嚟講多數都係睇「市價」。大部份打工仔都未必知自己嘅年資同職位，喺市場上係值幾錢，多數佢哋都係估估下，但其實有個簡單又快捷嘅方法一search 就知道。方法好簡單，其實公司喺求職網登招聘廣告時，多數都會喺求職網上輸入該職位嘅薪金範圍，以便求職者搜尋之用。大家只要喺搜尋欄上輸入自己嘅「職位」同「指定薪金」，然後你會搵到一堆空缺職位，之後再慢慢將「指定薪金」呢一項一級級咁遞增，你會發現有啲空缺職位去到某一個薪金時會消失咗，咁就代表該薪金指數就係呢個職位嘅頂薪。當然，呢個指數只能夠作參考之用，你人工嘅高低都受好多不同因素影響，所以參考完都要睇返實際情況，先好再去同老細bargain。

 

　　記住，同老細做review前，認真研究一下老細脾性同相對應嘅策略，千萬唔好令自己準備咗一年嘅籌碼付諸流水。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇