【創業之路】「做朋友」VS「做生意」　學識平衡生意和友情才是雙嬴

　　打工，就好似一班人坐上咗一艘天星小輪，就算你完全冇思想之下上咗船，因為船長知道自己去緊邊（其實又唔一定），所以總會有人帶你走一趟，只要大家安份守己就可以開心度過旅程。

 

　　而創業，就係自己做船長，一個人揼條「三板艇」後，再帶埋一個好似係壞咗嘅指南針出海，只知向太陽升起嘅方向航行，終有一日會到達終點。就算你之前計劃幾周詳都好，每日都會有無數嘅問題發生，而每個問題都只得你一個人去解決。

 

　　雖然創業咁多問題，但如果一世打工，總會令人有一點嘅缺失。所以好多人會坐上「三板艇」自己出走，亦會搵身邊嘅朋友幫手做partners。希望唔洗自己一個解決問題之餘，又可以分擔風險同投資資金。而且相識多年，了解對方脾性同背景，相信對方唔會加害於你，係創業partner嘅好人選。雖然係咁，但好多時搵朋友創業，都係失敗多、成功少。

  

 

能力不協調

 

　　朋友一齊創業，好多時都係一時興起，但其實大家都並無認真諗過，對方係咪真係一個適合嘅人選，冇試過對方有冇獨特嘅能力貢獻團隊，所以好多時到分配崗位同工作量時會出現亂子。可能團隊中某一兩個朋友並冇自己嘅長處，又或者連自己都搵唔到一個角色俾自己，最後會被分到一個無關重要嘅角色之上，猶如投閒置散，失去存在感同朋友間嘅信任，最後因為力有不逮而做多錯多。另一個常見嘅情況，某朋友係公司嘅高層，一直以來鍾意「講多過做」，令其他人覺得自己付出多，但某人付出少，最後隊員感到付出同回報唔成正比，結果因為公平問題不歡而散。

 

 

初衷不一致

 

　　團隊中未必每個人都係為咗發達而創業，有人可能只係想做自己喜愛嘅事，成功與否只係其次，過程先係重點，所以對賺蝕唔太著緊。而有人因為朋友邀請先參與其中，為「俾面」而參加，積極性偏低。亦有人因為想搵一桶金而合作做生意，對賺／蝕十分重視。創業初期各人理念可能會有好大嘅出入，如果喺生意營運或合作模式上未能配合，大家就會做作多少嘅退讓，改變自己嘅初心。雖然退讓係做人做事應有態度，但如果初期連自己嘅初心都改變太大，之後慢慢就會好易偏離本義。當生意遇上阻滯時，因為初時嘅立場唔一致，而質疑對方當時嘅方向同決定，最後引起更多更大嘅爭執。

 

　　「做朋友」同「做生意」好大分別，「做朋友」係感情為先，利益為後，但好多時「做生意」剛剛相反。搵朋友做生意時，會經常出現好大反差，可能同你相識時嘅佢完全唔同，最後會由「搵朋友做生意」，變成「做生意嘅朋友」。所以創業時，除咗考慮夾錢、夾能力、夾人品，亦要懂得拿捏對方嘅一把尺，來平衡「生意」同「朋友」嘅對立點。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇