搵醫生？問醫生！

　　上周本欄——幸福死亡方式：猝死！

　

　　這文引起不少醫生老友共鳴。其實，醫生都係人，通常唔怕死，但怕痛楚或被插滿各式維生儀器及喉管等死。所以，共同願望——猝死！

　

我認識不少醫生及幾乎所有護老院服務者，皆贊成安樂死。

　

　　最搞笑為A醫生：「碌Sir，下次生日，千祈咪恭祝我乜乜長命百歲，老如松柏或壽比南山。如今我已是長者，隨時拜拜。你最好祝我——去得突然，走得安樂！哈哈哈。」

　

上周文章刋出，醫生老友紛紛來電認同猝死是「幸福死亡方式」。

最「不幸福死亡方式」，是被迫接受各種維生儀器拖延極度的生前痛苦。

　

　　好似搞笑，其實，邊個唔想？

　

　　與幾位醫生共飯，酒過三巡，大把嘢聽。不是病人私隱，而是，醫生有病點搞？

　

　　同行相輕，理所當然。不過，相輕之外，亦更知——行家一出手，便知有沒有。

　

　　B醫生：「我哋做醫生，最清楚同行邊個係『波仔醫生』（冇需要都叫人通波仔以斬十幾至廿幾萬）、『劏人醫生』（一知你有買保險就幾大說你施手術，並開出天價！ ） 及『曝光冇料醫生』（經常在媒介曝光大隻講，其實醫術麻麻）。所以，自己有病，絕對唔會搵呢三大類人馬。」

　

　　當晚，幾位資深醫生交換名單，假若自己患上各式重病，包括精神、腫瘤、前列腺、心臟、脊髓、眼睛、腸胃……總之心肝脾肺腎出問題，各人都有個同行專家名單！」

　

　　各位，若你有病要搵醫生，最佳方法——問醫生老友！佢哋最清楚也。

　

醫生們最清楚自己有病時找誰。故此，他們的意見最有用。

　

　　講起問醫生，小弟也有一個經驗可分享。基於法律責任，現今個個醫生都懂得保護自己，絕不會「逼」病人接受任何手術，以免一旦出事要上身，甚或，分分鐘被「告甩褲」。所以，必定將責任交回病人或其親屬——嗱，你決定㗎咋！

　

　　我的想法好簡單。其實，病人知識，邊可能及得上專家？所以，當一個咁講，兩個至三個醫學權威都咁講，建議你某一種治療方法，信喇，肯定好過你自己傻下傻下落決定！

　

　　所以，當我要面對手術而被醫生問殺唔殺時，小弟一定會笑笑口問：「若你係我會點選擇？」

　

我曾眼中風，需打針入眼球，之前，反問醫生：「你問我同唔同意，換轉係你會點答？」

　

　　2015年，不幸眼中風，要打三針Eyelea藥水入眼球。進行前，醫生照來列出「可能的風險」——打盲、爆血管、視網膜脫落……好得人驚。

　

　　我細細聲問：「你係我，打唔打？」

　　

　　佢也細細聲回應：「其實，出事機會幾十萬分之一，好安全！但仍由你自己決定！」

　

　　佢幾大唔上身，以免孭鑊呀！

　

手術知情同意書只是官樣文章，難道你會不同意？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【雙11感謝祭】雙重優惠、多買多賞► 了解詳情