《經濟不停學》小學雞學堂5：靠移動平均線學識順勢而行，但有時都會fake人！

　　前一集就介紹咗SMA（簡單移動平均線）同EMA（平滑移動平均線）嘅特質，唔同日數嘅ＭＡ線有咩作用，今次就講下MA線嘅排列可以點樣幫我地睇到股價趨勢，股價喺唔同階段我哋可以有乜應對方法。

 

買／賣貨前諗一諗，分清股價强勢定弱勢

 

　　睇股價趨勢其實唔應該淨係睇一條ＭＡ線，最普遍係會睇晒十天、二十天、五十天、百天同二百五十天線、如果真係炒超短期，可以睇埋五天線或者直接睇分鐘圖。而上面提過嘅線，如果短期、中期、長期由上而下排列，同時股價處於所有MA之上，代表現價係超強勢，短、中、長線嘅買家帳面都有賺，上升軌可以講係好靚。而如果短、中、長期線唔係順序排列，喺呢個情況，股價依然處於所有MA之上，代表現價都算強勢；股價處於所有MA之下就代表弱勢。最差嘅情況係長期、中期、短期MA線係上至下排列，股價處於所有MA之下，就代表短、中、長線嘅買家帳面都有蝕，現價係超弱勢，亦即係樣衰。

 

阿里巴巴（09988）傳被中國監管機構要求同創辦人馬雲徹底切割，又要剝離一啲同主要網上零售業務無關嘅資產，依家百天、五十天、二十天、十天MA線上至下排列，股價處於所有MA之下，現價係超弱勢。（資料圖片）

 

中國今年GDP增長目標係「超六」，市場對目標幾滿意，內銀建行（00939）依家十天、二十天、五十天、百天、二百五十天MA線上至下排列，股價處於所有MA之上，現價屬超強勢。（資料圖片）

 

　　不過上面所講嘅四個情況，只係確立趨勢，唔係叫人買或者沽，而係應該順勢而行，例如喺超強勢中採用宜Call不宜Put嘅策略，再配合其它指標做買賣訊號。

 

　　靚仔或者樣衰嘅情況其實並唔多見，但一般都會分到股價係強勢定弱勢。另外有一種情況，就係所有線靠得好近或者揦埋一著，咁係代表市況缺乏方向，可以等一啲短期MA向上突破或向下插穿長期MA先再做部署，如果有突破，投資者可以追入；如果插穿長期MA，可以先沽貨止賺／蝕。

 

黃金／死亡交叉

 

　　黃金交叉意思係指一條較短期嘅移動平均綫，由下而上突破一條較長期嘅MA。當呢個型態出現果陣，後市多數有升勢，算係買入訊號。而死亡交叉係指一條較短期嘅MA線，由上而下跌穿一條較長期嘅MA線，出現果陣，後市多數會跌，係沽貨訊號。

 

　　無論係黃金交叉定死亡交叉，組合普遍分為短線訊號（十天線同二十天線）、中線訊號（二十天線同五十天線）、長線訊號（五十天線同二百五十天線）三種，當中以長線訊號嘅交叉組合最多人用，又稱終極黃金／死亡交叉，出現次數較少，準確度亦相對較高。

 

　　因為二百五十天線代表一年嘅平均股價水平，如果股價跌穿咗，代表轉勢入熊市，升破代表轉勢入牛市，所以又叫做牛熊分界線。 至於五十天線代表嘅係約兩個半月長嘅交易日，出現黃金交叉啫係市場對大市或個股長期趨勢睇好，而且呢種睇好已經持續一段時間。

 

　　不過，投資者要留意，如果黃金交叉出現後冇耐就出現死亡交叉，就應該視之前嘅黃金交叉做假訊號。亦有啲持股較多嘅大戶會特登整個假嘅黃金交叉出嚟引散戶接貨，呢種情況多數會喺股價跌緊嘅時候出現。

 

國壽（02628）由上年７月起一直陰跌，最近十天同二十天線喺2月24號出現黃金交叉，但在約一周後十天再度跌穿二十天線，所以之前嘅黃金交叉係假訊號。（資料圖片）

 

撰文：吳藹林

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】上海有女子赴瑞士接受安樂死，引網民熱議。你是否支持安樂死？► 立即投票