林鄭師承689衣缽，涼粉、路線、政策、態度、中聯辦，統統一脈相承，所以好難怪，佢嘅民望有如江河日下，全因為佢揀咗行呢條路。

 

　　「你快樂過生活，我拼命去生存」，應該係林鄭過去呢段時間嘅寫照，其實個幾星期前，大家都估唔到呢位自詡咁打得嘅資深政務官，連生活嘅基本智慧都欠奉，就好似被眷顧多年嘅寵物突然被人遺棄到荒野，失去咗生存嘅基本技能一樣。不過都啱，離地咗咁多年，做吓實事，當歷煉囉。上屆唐英年都係咁架咋，去到咁上下就會由個天跌返落地，到時想再離地都難矣。

 

　　林鄭實事多籮籮，旁人睇見笑呵呵，大家一齊回顧吓。

 

　　上星期嘅港鐵一日遊，由「堅離地城」上車嘅林鄭，可能因為佢深信自己瞓喺度都入到閘，所以率先示範，自己原來唔識入閘，揭發原來八達通推行廿年，仲有香港人唔識用。去到利東，佢就唔知自己喺邊站，被佢搭訕嗰位女士，就乘機偷偷訕笑住咁樣糾正，成為一星期內第二次。點解係第二次？因為林鄭唔知碇，已經唔係第一次，相信大家都記得，喺佢辭職獲批當日，佢出席歌唱家費明儀喪禮的時候，佢連地方都搞錯，去錯咗對面海間大酒店。

 

　　到上周末，林鄭展開講多錯多嘅序幕，星期六先被網媒揭發，佢同多個傳媒高層閉門見面時，突然講真心說話，話香港如果選出一個特首而中央不任命，會出現憲制危機，所以佢最終決定參選。輿論炮轟林鄭，係咪想暗示中央唔信任佢嘅勁敵曾俊華？係咪假傳聖旨？胡國興係參選人，同時頭戴另一頂帽──前選管會主席，係選舉條例嘅專家，即時質疑林鄭嘅講法係咪違反條例？

 

　　林鄭辦解畫，話言論唔係針對任何候選人，只係作事實陳述。林鄭喺22號親身回應，但其實好九唔搭八，話自己仲喺政改mode，未習慣唔係用一個官員身份講嘢，所以用咗解釋政策嘅口吻去講。跟住，史上最趣怪嘅轉移視線手法出現了，林鄭臨離開扑咪陣之前，爆肚講多一番說話，話自己宣布參選後發生好多事，自己未適應身分轉變，又要忙搬屋，期間發生一件事：夜闌人靜，林鄭新屋用茅廁，突然發現冇廁紙，先發現原本七仔ＯＫ都冇廁紙賣，最後毅然搭的士，返舊官邸解決以免壞肚子。

 

　　如果喺fb或者討論區睇到有人出呢啲post，一係俾人派膠，一係就問一句：「哦，你話俾我聽做咩啫？」除咗係想學689咁，用一個公關危機蓋過另一個公關危機之外，我完全諗唔到用意何在，而且引起外媒口中嘅「廁所門（Loo Paper Gate）」，難道林鄭辦認為香港人會同情一個女強人外表，公主港孩內在嘅人？

 

　　用一副橫行霸道、堅離地城嘅態度行出嚟，呢個係佢同五年前689出嚟選時最大嘅分別。林鄭係咪愛自滅呢？我傾向相信佢係有少少呢個諗法。我係有啲懷疑佢係咪真係想選特首。皆因佢呢段時間做嘅嘢，係無視一切競爭，真係以為自己坐定粒六。而連番事件，從故宮「為免中央尷尬」，到閉門見傳媒高層「傳聖旨」，一切都反映呢位繼承者無意去玩選舉呢趟渾水，所以不惜一切要用高壓手段搶過半選委提名。選前都已經唔做戲啦，俾佢選到，佢仲唔變女版特朗普？

 

　　同樣湊巧嘅係，眾所周知，689個女梁齊昕，同埋林鄭個仔林節思，都係反對自己阿爸阿媽做特首。過咗呢個幾星期，我終於明白到，梁齊昕同林節思係好偉大，佢哋唔單只係出於私心，想自己爹吔媽咪多啲留喺自己身邊；佢哋其實都係為咗香港好。唔排除佢哋心裏明白爹娘嘅為人，更加唔排除，佢哋掌握港人脈博，唔希望香港要先後由一個愛樹敵嘅小器鬼，同埋一個白鴿眼嘅公主病人管治。

 

　　而家四位建制派馬仔當中，包括林鄭在內嘅三位候選人，都唔似真係做緊一場完整嘅選舉工程，胡官緊守前選管會主席嘅崗位，而葉劉係活像過路人。只係得曾俊華畀人睇到，即使係假戲真做，但佢起碼肯做呢場戲畀大家睇。

 

　　雞年將至，香港來年會是鴇雞司晨，抑或鶴立雞群？其實唔到我哋最後決定，但香港人啊，盡做啦。最緊要，還是祝各位身體健康，港情繁盛。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好