近期，香港嘅「氣候」令人好吃不消，應熱不熱，應凍不凍，去到近一星期，更加陷入「極端天氣」，連續四日，一次過感受晒春夏秋冬。聰明嘅讀者都知道，唔係形容緊溫度，而係形容緊呢四日每日換畫嘅新聞主角。  

 

　　政治劇高潮迭起，今個星期尤其熱鬧，每日都有重點sound bite，追看趣味高過大台嘅淡靜抗日劇多多聲。星期一到星期四，分別由四個主角領軍，星期一，林鄭月娥飾演月夜女狼；星期二，葉劉淑儀化身酸縮葡萄；星期三，689官位垂死躊躇掙扎頓現餓狼本色；星期四，曾俊華脫胎換骨仿似成為民間特首。   

 

　　呢四位令香港人「來回地獄又折返人間」嘅官s或前高官s，係咪「春天分手秋天會習慣」就未知之數，但係佢哋展現出嚟迥異嘅態度，就好似顯露出四種唔同嘅溫度，甚至乎不同氣候，你鍾意邊樣呢？  

 

　　首先講吓星期二出場嘅葉劉淑儀，哭訴妹妹林鄭被讚有擔當，但自己就嚟乜都冇晒。佢反問蒼天一句：「唔通可以話我對香港冇擔當咩？」。個人認為，葉劉係春天嘅代言人。喂！咪住先，春天喎！？我知我知，你哋睇到呢句，會好想打我，已屆花甲、形象硬朗嘅葉劉，點能夠代表生氣勃勃嘅春天？首先，葡萄萌芽之時正係春天，正在吸收日月精華，但能否成熟，都要睇好多因素，例如會唔會畀人搶養份啦，甚至一腳踩死。第二，春天對香港人嚟講，係濕濡嘅代名詞，令人感到麻煩、心情差，葉劉濕透嘅雙眼，唔能夠令佢嘅支持度「起機」，反而令人覺得佢為咗獲得特首之位，心胸變得比以前更狹窄。濕濡嘅葡萄，好難再吸納支持。

 

　　星期三出場嘅689，好明顯就係夏天嘅代言人，而且係熱到盪手、炙熱難擋。五年以來，佢帶住一個火紅嘅心，去用佢自己嘅方式「服務」香港，佢係好勤力，唔會否定佢呢樣嘢，但係佢始終係用猛火去處理所有事務，呢啲咁嘅夏天，我同你都唔想要。

 

　　可能就係因為咁，中央就想換吓氣候。咁轉冬天好，定係秋天好？林鄭月娥繼承梁振英嘅路線，但係佢嘅感覺係另一個極端。星期一佢搶薯片頭啖湯宣布參選，對答俾人一種孤高之感，佢所追求嘅，係上帝同上面嘅支持，但下面嘅人民呢？林鄭作風比葉劉更硬朗，西九故宮館一事可以見到，佢出手務求乾淨俐落，亦都比梁振英更加唔鍾意聽到批評嘅聲音。萬一佢上任，會點樣對付香港人嘅言論自由呢？一諗到呢點，不期然心寒萬分。林鄭係屬於冬天嘅。

 

　　剩返秋天。秋天乾燥、微涼、送爽，係去郊外最好嘅時間，對我嚟講心情亦都係最好。秋天亦係夏冬之間嘅一個緩衝期，但可惜，近年秋天越見罕有，好多時都係熱咗好一排，突然間就變到好凍，根本就吃不消。

 

　　曾俊華就係以呢種小清新嘅姿態，成為「極罕」，亦造就佢喺網上民望最高。但秋天有個死症，就係短暫，秋天嘅美景閃瞬即逝，香港人而家對於薯片嘅良好願望，會唔會好快就消失得無影無蹤呢？尚待觀察。

 

　　四季各人有喜好，但係幾時轉季，轉變個季節，唔到我哋話事。選舉本來就係令我哋有得揀，但香港完全做唔到呢樣嘢。季節由上帝話事，我哋嘅特首係邊個就由上面話事。而家上面就係想香港直接由夏天變冬天，天氣突變，大家點會唔病呢？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】政府委任王冬勝明年起接任港大校委會主席，現任主席王沛詩不獲續任，五名年底任期屆滿的校委將全數換人，你對新任命是否滿意？► 立即投票