財爺施政報告前偷步「派糖」 4000蚊條數仲未找啊！

　　修例風暴令到政府成個管治威信冇晒咁滯，要重拾一定唔係一時三刻，但家下民怨日深，點都要搞搞佢，所以財爺陳茂波（波叔）今日一於偷步喺《施政報告》前宣布派糖，公布左一系列紓困措施。朋友仔即刻同Jenny講笑咁話：「沒有抗爭，那有糖派！」小妹忍唔住反佢白眼，心諗：「我仲未收到4000蚊啊！」

 

 

 

等Jenny同大家睇下有咩主要措施先：

 

　　1﹒將2018／19課稅年度內的薪俸稅、個人入息課稅及利得稅的稅務寬免百分比，由本年財政預算案建議的75%增至100%，每宗個案上限維持2萬元，預計143萬人受惠，涉18.4億元。

 

　　2﹒向領取社會保障金額的人士，額外發放相當於一個月的綜援標準金額、高齡津貼、長者生活津貼或傷殘津貼。在職家庭津貼及以個人為單位的鼓勵就業交通津貼，亦會作相若安排，涉40億元。

 

　　3﹒在2019／20學年，為本港的幼稚園、小學及中學日校學生提供每人2500元的津貼 ，料超過90萬學生可受惠，涉23億元。

 

　　4﹒為房委會及房協公共租住單位的較低收入住戶代繳一個月租金，涉14億元。

 

　　5﹒為每個電力住宅用戶戶口提供一次性2000元的電費補貼，料超過270萬戶受惠，涉56億元。

 

　　6﹒邀請關愛基金考慮為非公屋住戶和未領取綜援的低收入家庭（N無人士）提供一次過生活津貼。

 

　　7﹒房委會、機場管理局、建造業議會、科技園及數碼港亦正制訂相關寬免措施，具體措施將由相關機構另行公布。

 

點會唔關政治環境事

 

　　近排唔少風聲都話可能全民派8000蚊，亦都有政黨咁樣同波叔提議過，不過今日波叔就冇話派8000，令唔少人失望啊！波叔就解釋今次紓困措施針對中小企基層市民及一般中產人士，等佢哋冇咁大壓力，比全民派8000方案聚焦啲咁話。

 

　　佢仲話今次派糖同最近嘅政治事件無關，因為政府一早預告咗有關香港經濟所面臨的壓力，又用颱風做比喻，話係要為相關的壓力做好準備。Jenny就覺得，遲唔公布早唔公布，響反修例示威愈搞愈大鑊嗰時先公布，完全唔關政治事？真係信不信由你喇！

 

加唔加碼仲未知 10月有得袋咁啲

 

　　嗱！老老實實，小妹就唔係受惠太多，遲下粒糖有冇得「加碼」先？財爺睇嚟都怕講得太實會收唔返，又令市民失望，所以答得好含糊，話會「動態評估」、「不斷留意外圍同本地情況」，「盡可能減輕市民生活上嘅負擔」……

 

　　唔講咁多，實際啲！大家都好關心，幾時有錢落袋？幾時可以Feel到受惠先？財經事務及庫務局常任秘書長（庫務）劉焱就話，相關措施最快可通過行政措施實施，好似租金減免，今年10月可以陸續落實，其次是費用減免，而其他各類補助津貼等開支項目，就要等到立法會「開鑼」，向財委會申請額外撥款先得喇。Jenny一聽，就覺得似乎將會係另一次漫長嘅等待呢……

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情