鄭若驊突然結束訪滬行程返港 原因耐人尋味

　　「沒有她～很想去捕捉她～」話說律政司司長鄭若驊原本就係由星期日（18號）起一連三日訪問上海，同下上海市政府官員會面、拜訪下內地法院，見下內地業界代表咁，都係一般野啦！但奇就奇在，行程未完，尋晚佢忽然返咗香港，究竟有咩大事要司長咁急趕返來呢？

 

為趕返香港 不惜放研討會飛機

 

　　Jenny尋晚見政府新聞處發新聞稿表示，鄭司長晚上（19號）返港，而律政司代表團同其他成員，仲有業界代表就繼續在上海行程。鄭司長為咗趕返香港，不惜放咗由律政司、上海市法學會、上海經貿商事調解中心合辦嗰個研討會飛機，提早結束行程返港。行家同Jenny都好奇怪，點解會無啦啦中途離隊呢？唔通發生咗咩大件事？即刻問問律政司司長辦公室先！

 

　　辦公室就話，鄭司長提早返港係要「處理公務」，咁係咩公務先？不如都係直接問鄭司長喇！行家們一於去接機「捕捉她～」，可惜佢尋晚12點幾落機之後，唔知係咪心繫工作，記者問咗好多嘢，好似「係咪要處理特別事務？」，「點回應市民星期日的遊行？」等等，鄭司長好似都冇咩反應，冇回應到就上車走咗喇！

 

「公務」嘅演繹 你覺得呢？

 

　　嗱！問題就嚟喇！ 「處理公務」有好多種，風頭火勢之下，大家對「公務」嘅演繹，自然就更加多元化啦！Jenny嘅朋友間就有以下對話喇：

 

　　朋友A：「Jenny，我呢就覺得可能係叫鄭司長返嚟快快手執手尾，話晒佢都係落台熱門人選！執完手尾唔該問責下台！」

 

　　朋友B：「傻豬啦！而家冇人肯入熱廚房，鄭司長個位不知幾穩，我就覺得佢係趕返來處理檢控班示威者嘅嘢喇！嚇下佢哋，等佢哋唔可以再用暴力咁囉！」

 

　　朋友A：「咁721元朗事件打人嗰班呢？不如搞掂佢地先啦！」

 

　　朋友B：「所以話你吖！阿sir做嘢唔使你教，DOJ做嘢更加唔使你教啊！」

 

　　之後佢地兩個來來往往就嚟嗌交咁款，Jenny當然即時現身做和事佬，應承佢地下次見鄭司長一於問清楚！（如果司長肯答的話）

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好