11月9號晚嘅旺角大球場，香港足球代表隊同巴林踢咗場友誼賽。從一開始，呢場比賽嘅結果無咩人關心，更加無人會講下港隊球員嘅技術狀態同戰術，焦點一直都喺「球迷」身上。果然符合「市場」嘅大部分人預期，國歌一高奏，球迷「噓」聲四起，有球迷唔起立，更有人立即起身去廁所。

　　「國歌法」已經喺內地通過咗，香港作為中國嘅其中一個特別行政區，亦都即將會就「國歌法」，根據香港嘅本地情況而訂立法例。相信如果香港今日已經訂立法例，噚晚好多「搞事」球迷都已經係犯咗法，亦可能會面臨檢控。

　　球迷究竟幾時開始噓國歌？回一回帶，2015年踢緊世界盃分組賽期間，當時香港政治氣氛已經非常凝重，中國足協喺6月出咗張海報，指香港隊「有黑皮膚、有黃皮膚、有白皮膚，這麼『有層次』的球隊，得防著點」，結果即時令香港球迷大反彈，指中國足協種族歧視。喺6月港隊主場對不丹，球迷就喺奏出義勇軍進行曲期間，出現「柴台」行為。自此之後，所有嘅香港主場賽事，一奏國歌都聽到「噓聲」，直至依家。

　　睇完呢段歷史，可以話噓國歌呢個動作，一開始係單純支持港隊嘅行為，係可以理解；但係久而久之，噓國歌變成基本動作，變成為某些年青人喺政治上表達立場嘅表現，就變成為非常幼稚同埋唔知道咩係「尊重」嘅行為。

　　噚晚場球賽之後，有傳媒訪問啲球迷，聽到佢地講嘅原因，真係令Tina擰晒頭；包括有球迷話不滿中國政府所以噓國歌，亦有人話知道將會立法，所以更加要噓國歌以表達不滿。呢班年青人根本唔明白體育係唔應該扯上政治。

　　無論幾唔鍾意一個人或者係一個團體，後生仔係唔係就可以為所欲為，去做一啲唔尊重人嘅行為呢？你唔鍾意嘅人過咗身的話，你係唔係可以去佢嘅喪禮播返首「喜氣洋洋」呢？我會尊重你對身分認同有唔同見解；但喺球場上、喺儀式上播放國歌時作出呢種行徑，作為土生土長嘅香港人，我覺得你係丟緊我嘅架、丟緊全港市民嘅架！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇