無論係大至一國嘅總統，少至香港一個細城市嘅區區一個區議員席位，有選舉進行嘅地方，就一定會有選舉「機器」運作。選舉唔係一人之戰，特別係選舉發展已經有一定程度的地區，選舉背後講嘅係人力同財力，更加係其中一項好重要嘅成功要素。

　　西九立法會補選未正式開鑼，其中一名「疑似候選人」、前食衛局政助陳凱欣嘅宣傳已經係鋪天蓋地，街邊橫額直幡不在講，有佢大頭相嘅大形廣告牌，照樣高掛唔少迷信之徒都避之則吉嘅紅磡區殯儀館上，唔怕你大吉利是，只怕無人見到佢、無人認識佢。

　　但係一個無公職嘅社企CEO，究竟可以拎咩牌頭去咁樣宣傳？「九龍社團聯會健康大使」是也。大家真係不得不佩服建制派選舉機器嘅諗頭同運作能力，一個大台記者出身、唔係咩醫護人員、唔係運動員，只係憑前食衛局政助嘅身份，都可以用「健康」之名去宣傳自己。更重要嘅係，呢個「健康」只係照顧西九龍嘅人，喺東九龍係一啲都唔健康。

　　有評論就話(特別係泛民嗰邊嘅意見)咁係一場不公平戰爭，因為陳凱欣喺未選之前就已經投入大量資源去宣傳，又唔使計入有上限嘅競選經費，對其他準候選人不公。呢個講法其實係似是而非，因為其他有意參選嘅人，有意無意地都會突然現身宣傳。Tina最記得，喺幾位前議員被裁定DQ議席之後，有DQ選區嘅地鐵站即日就已經有非建制嘅區議員擺街檔宣傳自己，咁樣唔通唔係佢利用現有區議員身份之便去做宣傳備戰？

　　天下烏鴉一樣黑，所有選舉都有機制，有機制就一定有漏洞被人去鑽空子，泛民批評對手亦不過係五十步笑百步，只不過你做得細人地做得大就話唔公平，咁不如你話自己唔係李嘉誠個仔好唔公平好過啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情