如何識破網上情騙？

　　靚女發霉，並不出奇。

 

　　一日，靚女朋友忽然問我：

 

　　「你睇我有冇桃花？」

 

　　嘩！佢竟然由發霉變咗發光！

 

　　「梗係有啦，不過唔知係桃花運定桃花劫啫。」我答。

 

　　「有人冧吓都好呀！」

 

　　原來係網上情緣，對方係英國工程師，中年喪偶，現在事業有成，仔女大晒，就想搵番個soulmate，陪睇溫布頓網球賽同世界杯，或者得閒煮吓飯仔，齊齊享受人生。

 

　　網上交往不足兩周，男子已經向我女友求婚，問佢想住喺邊？英國定香港？仲承諾要買間香港豪宅畀佢。我女友半信半疑，但都被氹得兩腳不著地、一心飛上天。

 

 

　　一個初冬早晨，我正在開會，女友十萬火急whatsapp我，話狐狸露出尾巴喇！「男友」話要去馬來西亞做大deal，一時間未開到銀行戶口，問我朋友借七千美金，朋友係有腦靚女，死人話冇錢，「情郎」立刻蒸發咗！

 

　　容許我用小女人嘅偵探邏輯，分析「案情」，大家可以注意騙徒以下破綻：

 

一．承諾唔靠譜

 

　　佢雖然畀晒佢自己、佢亞媽、佢仔女、佢間屋、甚至佢隻狗嘅相（九成係hack番嚟）畀你睇、又晒身家話同你一齊駛，仲出埋豪宅金屋計。但連真人都未見過、手指未掂過，竟然求婚，腦殘咩！

 

二．文字冇水準

 

　　佢D英文，點都唔似出自native speaker。不過當時我指出嚟，女友話可能係蘇格蘭、愛爾蘭嘅村莊才俊呢。後來我睇報紙，先知道有騙財情聖集團，成員有非洲裔、印度裔、同馬來西亞人，唔怪得D英文寫得一舊舊，尤其是多run-on sentences，即係好大段先有一個句號，我懷疑佢地係左抄右抄，大量cut and paste，以為寫得長就夠動人，就呃到人（其實真係呃到嘅！）。

 

三．溝通欠邏輯

 

　　佢D情書，行文思路有問題，應該係因為「客戶」太多，未能有一對一服務，所以佢大包圍咁答，以為點都答到D卦，結果問非所答，但仍有人中招，以為佢口水多啫。

 

四．財力晒冷有問題

 

　　佢話自己好有米，跟住話自己身家有三百萬美金，此數在馬來西亞可能係好多錢，但喺香港，連靚D嘅豪宅都買唔到啦，冇見識！

 

五．要求冇說服力

 

　　四五十歲人，又話要做大deal，點會窮到冇朋友，竟然要問新相識借七千美金？勁失敗！

 

　　不過女朋友好positive thinking，話曾經有人日日噓寒問暖、狂讚你靚，幾好吖。仲講笑話係免費鴨（精神上）嘅服務！當然，你唔好因為一隻虛擬自來鴨而跌落水啦。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情