神奇女俠！車禍撞到彈起竟冇流一滴血，點解？

　　因果呢家嘢，原來唔駛追溯至多生多世，可以現世報，仲可能即做即報。好在，有罰又有賞嘅！

 

　　眼前呢位自然療法高手，就認為健康與因果有絕對關係。

 

　　「師傅，最近醫乜病多呀？」我訪問佢。

 

　　「腸胃同PK囉。撇開病理唔講，腸胃病可能因為講錯嘢；PK亦可能因為做錯事。」佢答。

 

　　「請舉例以說明之。」

 

　　「太多咧，不勝枚舉。不過，我醒起一單PK，好神奇！我個客跌倒，不幸畀車撞咗，將佢成個人拋起……」

 

　　神奇事件簿係咁樣嘅：

 

　　交通意外中，呢位客人畀車撞到彈起，飛出幾米之外，然後面朝天大字形落地，撻生魚咁撻。旁人都嚇親，以為今次後腦或尾龍骨落地，一定重傷！

 

　　點知佢不但all in one piece，仲冇流一滴血，自己爬番起身走人！

 

　　回家路上，她驚魂甫定，就接到她所屬道場揸弗人嘅電話。

 

　　「喂！你冇事吖嘛？」他問。

 

　　「點解你知我有事嘅？」她反問。

 

　　「你畀車撞倒吖嘛。」

 

　　「你點知？」

 

　　「觀音話畀我知。」

 

　　嘩！D天地線咁靈通！

 

　　「唔怪得我覺得好似有人托住我落地咁啦。」她說。

 

　　我可以想像她當時如蒲公英一般輕盈亮白，慢慢著地……。

 

　　究竟佢做咗乜事，得到安全著陸bonus呢？

 

　　原來她是熱心義工，多年來專注傷殘者，常常為他們推輪椅、帶他們去飲茶。自己唔夠一百磅，卻推百多磅的病人加輪椅，可見她不祇有愛心，還有巧勁。

 

　　因為樂助傷殘人，所以自己避免傷殘。

 

　　世界有輕量級嘅神奇女俠、同重量級嘅因果定律。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】上海有女子赴瑞士接受安樂死，引網民熱議。你是否支持安樂死？► 立即投票