2017-06-30
【真係可以賺到錢】嚴選古怪生意（下）
上次為大家揀選咗「出租母雞」、「執手尾服務」、「天堂訂座」呢啲古怪生意，有讀者覺得呢啲生意雖然得意，但難賺大錢。其實如果盤生意一開始已經被position為「古怪」type的話，佢能唔能夠賺錢嘅成功要點多數會先睇其爆炸力，之後再睇其實用性。呢類生意多數都係靠本身「古怪嘅爆炸力」去賺取人氣，如果之後真係有其實用性，先能夠長遠成為賺大錢嘅工具。而以下三盤生意當中，有啲就真係有其實用性同價值（我覺得）。
對比之前提及嘅古怪生意，" I Do, Now I Don’t “ 呢盤生意比較有賺錢潛力。
情侶分手後，除咗要處理感情問題之外，另一件煩事就係要處理對方送嘅訂情信物。有人會選擇將訂婚／結婚戒指掉咗佢，無眼屎乾淨盲，亦有人會攞去變賣，將愛恨化作金錢。但可惜二手鑽石多數都唔太值錢，所以賣價都好低，變相係食之無味，棄之可惜。有公司就睇中呢一點，開設二手買賣平台，除咗比人「將過去咗嘅一段情化作金錢」之外，你亦可以喺平台上買到平價二手戒指，可以話係一個二手婚戒嘅eBay。而呢個平台有近過百萬隻戒指，估值約US$4.2 billion，公司只要每單賣買抽1%佣金，都已經賺到盤滿砵滿。
呢一盤生意係真真正正嘅「屎橋」，「送屎給 "摯友" 」其實早係幾年前已經存在，當大家以為呢行無得做嘅時候，但原來早喺幾年前已經有好多公司靠「送屎」賺錢。
以 ShitExpress 為例，顧客先喺佢哋嘅網頁上揀選你「鍾意」嘅動物糞便，再寫上朋友嘅地址同「關心」字句，而呢一刻，你嘅報仇之旅就正式開始。ShitExpress 開業2年多，總收入約有港幣72萬，送出大約5千幾份屎到唔同國家。雖然港幣72萬唔係一個大數目，但計返條數每個月都有2萬零蚊收入，如果以一項side business嚟講，賺錢能力都叫OK啦。有啲公司仲會提供好多不同糞便嘅選擇，牛、狗、猩猩、以至大笨象等等都有，佢哋仲有「混合」嘅package提供，等你朋友可以收到一份獨一無二嘅禮物，真係貼心。
唔知大家有焦無察覺，近年多咗好多單身人士成日「扮拍拖」，所以早幾年有公司推出咗「隱形女友／男友」服務，你可以自己「打造」一位獨有嘅情侶，不論外表、背景、相識故事等等都可以由你一手創造出來。價錢由每個月US$9.99到US$49.99不等，有「Just Talking」、「Geeting Serious」、「Almost Engaged」三個package可供選擇，服務包括簡單嘅情侶互動短訊、同你喺Facebook上改成 “ in-relationship” 狀態、真人留言或者電話對答、送上小禮物等等，呢啲服務真係可以呃倒下人，亦呃埋你自己。而其中最神秘嘅係，佢有一項叫「Emergency Interaction Button」服務，如果有用家知道的話，不妨留言幫我解開呢個多年嘅心結。
做marketing就係每日努力去發掘商機，先唔好諗你盤生意有幾怪，亦唔好因為覺得怪，而框住自己嘅諗法。好多時怪生意只係一個初型，只要慢慢地修正，絕有可能成為一件高盈利、高爆炸力嘅生財工具。怪嘅生意唔一定唔賺錢，賺倒錢嘅生意就唔需要理佢怪唔怪～
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
第九屆「傳媒轉型大獎」請投etnet經濟通一票！► 立即行動
