【直播熱潮】個個品牌都玩Live，唔通個個都啱玩Live？成功宣傳取決於甚麼？

　　個個都玩live，唔通個個都啱玩live咩～近期好多品牌公司、歌星藝員等等都開始玩直播，學習中國大陸網紅嘅直播手法為公司／自己做宣傳，就連大品牌LV都玩埋一份，好多公司都話呢個係一個好新嘅銷售概念，並其實直播又係乜野一回事呢？LV咁做又正唔正確呢？

　　先講少少歷史，其實直播銷售早喺80-90年代已經開始，並唔係一件新事物，只係當年嘅平台係電視，而今日嘅平台係social media，但手法可以話十分相似。當中一間較早推出直播銷售係美國Home Shopping Network（HSN）公司，佢哋早係80年代已經有電視直播銷售，建立咗在家消費嘅雛型，之後90年代喺歐美、亞洲不同地區亦開始試行電視直播銷售。最初呢種營銷模型尚算成功，節目中給予觀眾限時優惠，利用消費者「衝動性消費」去推動生意。

　　但後來其銷售手法出現好多問題，例如主播誇張嘅宣傳手法令人反感、產品質素未必有保證、產品多數係死貨等等，大眾開始對呢種手法抱有疑問。加上消費者慢慢對產品嘅質素要求高咗，佢哋會思考並對產品做research後先會購買，慢慢「衝動性消費」對成熟嘅消費者失效，而電視直播銷售亦開始走下坡。

　　近年再次興起，其中一原因係marketing嘅周期好多時會不斷循環，其二係衝動性消費對國內效有用，所以網紅/品牌公司推出直播較為成功，而且直播成本「相對地」較便宜，適合一啲親民嘅品牌採用。

　　講得出「便宜」，對比真正拍攝嘅質素一定冇咁好，如果要質素好，就好難會平，亦因為平價直播會比人覺得較cheap，所以唔係所有品牌都適合做。早前LV嘗試用直播迎合國內巿場，不過直播後反應不太理想，雖然有網紅助陣，但很多人覺得LV嘅直播「十分low」，品牌擋次同直播手法有斷層，所以直播中亦出現很多負面留言。

　　做每一個宣傳手法都應該有其價值，而明星直播同公司直播有啲唔同，明星做直播唱歌，效果同現場睇演唱會一樣，即時fans互動加上即場表演，就係佢嘅價值。但公司做產品直播好唔同，主播嘅即場表演對觀眾嚟講冇價值，所以即時互動或時間性優惠就變得係必要，如果唔係，呢一個只係一條普通嘅影片，亦冇需要做直播，觀眾亦唔會定時定刻收看。而且直播有一定嘅風險，如果冇即時性嘅元素的話，又要追求好質素嘅影片，做普通拍攝會比較好。

　　國內十分盛行直播，但決定是否做直播，好取決於品牌公司有幾了解自己嘅品牌價值，同埋要了解做直播嘅目的，係做銷售？做品牌？還是跟潮流？而直播又是否同自己品牌吻合？直播時又能否有即時互動同限時優惠？呢啲都係成功嘅要素之一。

　　有腦嘅marketer係要懂得批判每件事情嘅成效，而唔係由潮流帶著自己走去一個唔適合自己嘅地方。一個鍾意飲可樂嘅人，如果因為要迎合其他人／場合而飲紅酒的話，飲紅酒帶比佢嘅快樂／回報，一定比可樂低。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票