【職場角色】人在職場要分飾多角，但絕不能扮演「小學雞」！

　　煒霆上個月被公司裁員，今個星期佢就好好彩咁搵到一份新工，喺一間本地公司做 sales。

　　第一日返工，撞正開 team meeting，煒霆作為 freshman 自然少說話多觀察。一小時嘅會議正常進行，大家update一下 call 客情況，老細又向下屬捽下數，同煒霆之前公司嘅 sales meeting相差無幾。會議最後十五分鐘，老細因為要趕住出去見客而離開會議室。就喺老細離開會議室嘅一刻，開會氣氛即時改變。

　　「你呀，做咩唔講你自己call嚟call去都係嗰幾隻熟客呀？老細講明要全新客呀。」Anson向住對面嘅Jasper講。

　　「唓，慘得過我舊客多！你呢，你咪又成日扮出去見客，其實就係匿埋打動森！」Jasper隨即反擊，並豎起左手中指，放到眼鏡嘅鼻樑位置，來回咁扮托眼鏡。

　　Anson眼見Jasper咁做，亦立即以相同動作回敬。兩個大男人，喺公司會議室長枱嘅兩面，以呢種形式針峰相對咗十幾秒。

　　煒霆目睹呢個情況，立即令佢聯想起小學時嘅情景，估唔到喺二十年後仲可以親身經歷。會議完結，煒霆對呢一班同事又多咗一份認識。

　　人在職場，即使你嘅職銜只有一個，但角色就可以有好幾個 —— 面對上司，你要有作為下屬嘅禮儀；面對下屬，你要有作為上司嘅威嚴；面對同事，你要有守望相助嘅精神；面對茶水姐姐，你要有相敬如賓嘅同理心。呢啲角色萬一拿捏得唔準確，好容易令人對你留下壞印象，甚至對你工作能力抱有懷疑。但身處辦公室，無論要扮演乜嘢角色，「小學雞」都不應該包括在內。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票