《經濟不停學》價值投資法講究評估公司內在價值，市埸先生好百厭！

 　　中國近呢幾個月狂推監管措施，由壟斷管到教育、細路打機、追星，最慘豬嘅係一眾喺香江魚缸上市嘅科技股，個價係咁跌，唔少缸友都要坐艇呀。同時，因為之前投資科技股得利而被網民追捧做女股神嘅Cathie Wood，聲勢就大不如前；反而一直以價值投資法做選股基礎嘅巴菲特，旗下巴郡（美：BRK）股價表現一啲都唔輸蝕。除咗讚股神果然係股神之外，更再次喚起唔少人對價值投資法到底有冇用嘅討論。 

 

　　事實上，價值投資法唔係巴菲特諗出嚟嘅，呢個概念最早由經濟學家班傑明葛拉漢（Benjamin Graham）提出，喺佢嘅著作《智慧型股票投資人》同《證券分析》建立出價值投資嘅完整策略。佢相信每一間公司都有佢嘅內在價值，而市場價格未必同內在價值相符，投資者應該喺市價低於內在價值果時買平股。之後呢套理論就獲葛拉漢嘅學生、股神巴菲特發揚光大。

 

《智慧型股票投資人》於 1949 年首次出版，係Benjamin Graham嘅代表作之一。（shutterstock圖片）

 

買股價睇實安全邊際，抵唔抵買自己決定

 

巴菲特曾喺2007年嘅致股東信講過，真正優異嘅企業，必須有一條持久嘅護城河，咁可以保證帶來超額嘅資本報報酬。（shutterstock圖片）

 

　　至於內在價值嘅估算方法有好多種，唔同人對同一間公司嘅估算係可以有唔同結論，一啲硬性指標例如有市盈率、市帳率、股息率、股東權益報酬率、企業現金流、負債等等，一啲較為主觀嘅衡量標準有企業可持續性、管理層管治能力、對股東利益嘅保障等等。巴菲特亦提出過「護城河」理論，即係企業有冇競爭優勢，可以係無形資產，例如品牌、專利、服務差異、低成本、產品帶嚟嘅獨特感受等等。

 

　　好嗱，到投資者決定咗內在價值，就可以靠一樣叫安全邊際（Margin of Safety）嘅嘢去決定買入時機。安全邊際指股票價格同企業內在價值之間嘅差距，股價比內在價值愈低，安全邊際就愈高，投資風險相對愈低（因為投資者有機會錯估內在價值），股份嘅潛在回報亦可以較高。以投資者評估某公司嘅內在價值為每股100銀為例，現價係80銀，若然投資者自己set嘅安全邊際目標係20％，依家就會係買入時機；但若然安全邊際目標係30％，就可以等股價跌到落70銀先買。

 

投資要有耐性

 

　　價值投資有一個壞處，就係會經常喺股價處於下跌趨勢果陣買入股份。班傑明葛拉漢將市場擬人化，話市埸先生心情起伏可以好大，當心情好嗰陣股價可以狂升，心情差股價可以暴跌，股價係可以唔符合內在價值嘅。但當市埸先生令股價愈跌愈低果陣，反映間公司股份大特價，按呢個思考邏輯嚟講投資者反而可以增持，因為一間公司嘅內在價值唔會因為股價波動而改變，投資係需要時間同耐性。

 

　　不過，價值投資法其實難以衡量一啲未有盈利同埋增長型嘅股份，因為一般散戶唔似大行咁，有自設model分析公司嘅潛在收益，從而評估價值。增長型股份又多數係炒憧憬，對價值投資者而言未必咁易捉到路。仲有呀，如果投資者眼光差，揀咗隻質素唔好嘅股份，最終冇得到預期中嘅回報，等同蝕咗時間成本，亦即係投資其他標的賺錢嘅機會。

 

　　其實呢個世界仲未有人研究出必勝嘅投資方法，自己學多啲嘢，結合唔同投資法嚟做分析亦無不可，最緊要係勤力，肯做多啲功課。

 

撰文：吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇