「強力部門」會咁不濟？

　　今個星期本來以為沉沉悶悶咁樣過，點知周末之前先嚟一場「精彩秀」。民主黨成員林子健聲稱喺旺角畀「強力部門」擄咗上車，主要係恐嚇佢唔好將一張有球王美斯簽名嘅相，轉交劉曉波遺妻劉霞。

　　Tina睇晒成個記者會，見民主黨晒冷式咁，連元老李柱銘都出動埋，主角七情上面、繪影繪聲咁指出點樣被「強力部門」拉上車、點樣暈低、點樣起返身重返市區等。但真係對唔住，Tina對成件事都真係充滿疑問，肯定無「銅鑼灣書店」咁，令Tina感到驚恐。

　　疑點一，林生話佢喺星期四下午，喺旺角砵蘭街球衣店附近畀人夾走。記住，嗰度係旺角，唔係沙頭角，隨便大叫一句已經大把途人見到兼且報警，點解佢唔大叫？再加上，林生話自己早幾日前已經收到「國安電話」，警告佢唔好將張相畀劉霞，咁嘅背景之下，喺街上面有個人捉住佢同佢講普通話，佢會無警覺到人地叫佢上車傾兩句佢就上？連叫聲「打劫呀」出唔到聲？難以理解。

　　疑點二，佢話自己喺車上面索一索就暈低，被棄置喺西貢醒返後，唔知自己喺邊，竟然唔係第一時間打電話，畀家人又好、報警又好，而係搵到一條小路，步行10多分鐘後，截的士回家。再者，如果真係有人公然喺香港違法，作為政黨中人，第一件事點解唔係去報警？報完警唔可以開記者會咩？

　　最後一個疑點，亦係最大大大大嘅一個疑點，大家覺得「強力部門」真係會咁樣做嘢咩？Tina更加相信嘅係，「強力部門」有能力將任何一個人帶走離開香港境，而係做到神不知鬼不覺，好似林生今次咁，聲稱嘅「強力部門」，做咗咁多嘢仲要畀你開記者會唱，值得咩？而喺北面嘅「強力部門」，又會唔會畀你好容易咁將張相交畀劉霞呢？值唔值得喺香港做咁多嘢？大家心入面秤一秤，就知道呢單料都係搞笑片多過係恐怖片。