真係不問蒼天問鬼神。

　　你以為啲神明喺另一個Dimension，睇凡間事物，會唔會out  out哋呢?

　　嘿!唔會。佢哋對國際政治形勢嘅掌握，肯定好過美國大口王特朗普!

　　中華智慧管理學會創會會長彭泓基今年出版咗「智慧的追尋」，旨在探討我國數千年嘅智慧如何影響社會、經濟、人生。佢惠贈大作之時，順便提及一種另類嘅智慧，就係道教扶乩(註) 嘅啟示。佢年初四去香港一道觀，親見乩文由字成篇，現在猴年已過逾半，哈!新春乩文又幾靈喎!

　　以下係「年情」乩文，概論香港情況及世界時局，調寄「滿江紅」:

　　「樓市繁華都去也，更無佳績。反喜望，地產形勢，早欲退色。拍地廳前牌舉舞，買屋抽票非陳蹟。價慢遜，困拙是開單常追逼。」

　　此詞上闕明顯指香港樓市成交淡靜、價格失色，買屋有人抽飛、經紀俾人追數。上半年大概如此。至於預告發展商買地踴躍，則係有先見之明。

　　下闕放眼世界:

　　「保身健、家居益。人遠行求安適。但荒洲細菌，亂發兇事。蚊蚋蒼蠅常防犯，西歐恐襲分秒即。到如今，只好遊公園，嚐零食。」

　　此段一開始已點明本年世人應如何自處，即要注意:

　　一.身體健康，最好在家中安住。

　　二.小心外遊，要講求安全和適合，猴年的旅行車禍偏多。

　　三.嚴防蚊患，即寨卡病毒，此問題已由發展中國家(荒洲)蔓延開去。

　　四.歐洲恐怖襲擊，分分秒秒會爆，本年恐襲之頻繁，地域之廣闊，令人震驚!

　　呂祖又幾幽默，醒你今年保險大法與享受人生之道，就喺踎定係香港，得閒作本地遊，賞吓花草、歎吓美食、安全又有益!

　　佢又點評國際重量級人物，呢啲政壇揸弗人影響世界時局，動輒擊起千層浪。仲提及梁振英，大家下期記得tune in呀!

　　註:扶乩(音機)是民間的占卜方法，由兩人或一人扶著木架的，依法請神，木架的下垂部分在沙上寫字，作為神的啟示。