《魚缸博客》「根本香港個經濟冇想像中咁差」？呢個命題幾值得討論

　　係網上討論區有一個熱門Post:「根本香港個經濟冇想像中咁差」，呢個Post上左熱門，同時都有KOL去討論，例如人稱「死場KOL」HEBEFACE都用POST內留言貼堂再回覆表示：「少咗人唱K、少咗跟車送貨單，日日望住個大環境變化。」

　　點解有人話香港經濟無差，又有人話香港百業蕭條，好似香港進入左一個「多重宇宙」咁，大家個認知好似相差咁遠咁？

　　睇返經濟數據，失業率無太大升幅，樓價指數穩步上揚。博客呢個聖誕節出街，西九、中環都係人頭湧湧，就算北上消費有幾多人，消費力好似依然存在；但另一邊廂，街邊吉鋪湧現，大型連鎖集團連番結業。

　　博客認為，要分開兩個層面去講。第一，香港金融業係有復甦，但對比起「以前」嘅金融業係蚊同牛比，以前所謂「魚翅撈飯」年代，係金融業搵十蚊，一蚊流去食店，一蚊流去零售，一蚊流去旅遊／消費，大家有得賺；而家呢個年代，係金融業搵十蚊難左，大家消費上理性左，所以錢只留係金融業，而流唔出各行各業。

　　第二，內地企業模式改變左香港格局。以飲食業為例，內地已經「內耗」到一個點，鬥價錢、鬥服務、鬥品質，無可否認鬥死左香港飲食業，因為香港飲食業長期係自己個圈圈閉門造車太耐，跟唔上內地變化，而香港同深圳只有一河之隔，不論香港人北上，又或者內地企業南下，就必然打死左一班「高傲的香港老闆」，呢個係自由經濟調節；而物流業發展迅速帶動網購平台，都係鬥死零售業一個主因，呢個並唔係香港問題，而係全球性現象。

　　所以香港點解進入左一個「多重宇宙」，某程度係因為某些行業逐漸轉弱／消失，另一方面金融地產行業繼續變好，所以香港唔同行業對於經濟認知出現左落差，呢一點，其實只要大家仔細思考，就會明白個世界又再變緊。

《編者按》本欄搜羅即市傳聞，惟消息未經證實，《經濟通》亦不保證內容之準確性。