《魚缸博客》蒙牛果然夠晒牛，收入利潤齊齊跌股價仲有得升！

　　《魚缸博客》魚缸呢排派緊成績表，按照常理，成績好嘅應該有獎勵，股價應該升，成績唔
好股價應該跌先係。不過，呢個新世界已經無乜嘢叫常理唔常理，業績好嘅股價反而隨時跌，相
反，業績唔好嗰啲股價隨時倒升。就好似中鋁（０２６００）同埋蒙牛（０２３１９）咁。
　
　　中鋁舊年純利創歷史最高紀錄：歸母淨利潤同比升８５％，資產負債率跌至近十年來最低水
平。派末期股息每股１３﹒５分，比２０２３年末期息多６９％。集團舊年仲首次派中期息，計
埋中期息，全年合共派２１﹒７分股息，按年大升１﹒７倍。盤數咁靚，派息又多咗咁多，照計
股價應該大升先係。點知人算不如天算，股價今早雖然輕微高開，但大部分時間枕住跌。雖然跌
幅唔算大，但都係跌。
　
　　相反蒙牛舊年純利跌剩１億人仔，跌幅高達９８％，即係幾乎無賺錢，股價今日反而升，最
多升８％，股價有機會位列藍籌半日升幅三甲。雖然話純利急跌嘅主因係子公司貝拉米商譽及無
形資產減值虧損，唔影響現金流，但期內收入下跌一成，點都係一個警號。至於末期息，雖然稍
微增派４％至５０﹒９分，但斷估都不足以支撐股價今日升咁多。
　
　　或者你會話係唔係蒙牛股價低殘，所以趁壞消息出咗，股價反升？似乎又唔係，蒙牛以噚日
收市價１８﹒４６銀計，比２月３日低位１４﹒７４銀累升２５％，期內恒指累升１６％，蒙牛
明顯跑贏大市。如果同舊年８月低位１１﹒８２銀比，蒙牛至噚日累積升幅更高達５６％，股價
點都唔算低殘。
　
　　而中鋁股價近期升幅亦唔算大，以噚日收市價５﹒１１銀計，比年初低位升２０％，期內恒
指升２３％。再同舊年８月低位比，中鋁股價至噚日累升２９％，期內恒指升４１％，中鋁明顯
跑輸大市。而家派成績表，業績又咁標青，股價仲要跌，博客真係睇唔明。不過，魚缸有時啲嘢
就係咁難明，如果咩都比大家明晒，可能又無咁刺激呢。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。