《小傳日記》京東「像素級模仿」ＨＫＴＶ，本地薑遭遇文化衝擊！

　　《小傳日記》京東（０９６１８）近期動作多多，繼早前喺內地啟動京東外賣後，近日強勢
攻港。喺港島柴灣佔地過萬呎的運營中心投入運營，並推出一系列燒錢吸客策略，包括推出「總
值百萬優惠券」活動，又提供６００銀新人專屬禮包等福利。除咗推出大規模補貼家電商品，仲
提供埋自營家電「３０日包退、１８０日有壞換新」、「一件包郵」等優惠政策，攻勢可謂一浪
接一浪！
　
　　明明京東國內版Ａｐｐ已經有現成界面，但佢嘅港版Ａｐｐ睇落就相當ｌｏｃａｌ，係咪夠
貼地先？咪住，開埋我哋本地薑ＨＫＴＶｍａｌｌ嘅Ａｐｐ嚟睇下先，乜咁似樣嘅？
ＨＫＴＶｍａｌｌ有「挑戰全港至抵價」，京東香港就有「挑戰全港比價」；ＨＫＴＶｍａｌｌ
有「日日秒殺價」，京東香港同樣有個「日日秒殺價」；至於ＨＫＴＶｍａｌｌ為紀念１０周年
增設「每日一店」優惠，京東香港當然無十周年啦，但一樣有「每日一店」。齋係名似都算喇，
佢甚至連ＵＩ設計同配色都幾乎一摸一樣。香港科技探索（０１１３７）行政總裁「魔童」王維
基都不得不發文，直指京東香港Ａｐｐ「學」足ＨＫＴＶｍａｌｌ，真係「難分真與假」。
　
　　由於一啲眾所周知嘅原因，大部分海外互聯網公司都無辦法喺神州提供服務，為當年方興未
艾嘅神州互聯網行業帶來機會，唔少初創公司都對海外成功案例進行「像素級模仿」，做出「現
象級」產品，之後再考慮在地化嘅問題。上文提到所謂嘅「像素級」並唔係誇張，有啲勤勞苦幹
嘅互聯網公司係會連對方嘅字體、用色、排版、文案都照搬，好聽啲講，係通過１００％嘅模仿
去加速學習進程，難聽啲講，咪即係抄。
　
　　不過公平啲講，「像素級模仿」嘅情況都唔止出現喺神州互聯網公司，Ｍｅｔａ老闆朱克伯
格都係模仿大師，旗下社交平台Ｔｈｒｅａｄｓ近來喺港台熱爆，其實本質上都係Ｘ嘅模仿產品
。
　
　　流量時代唔怕爭議只怕無人識，京東香港將王維基嘅炮火視作流量機會，直接發文回應！京
東話感謝對方嘅關注，強調唔係要同邊個鬥，而係想為香港市民帶來真正優惠。京東又話，香港
物價較內地高出唔少，當中包括高昂租金、運費及服務費，而京東採用嘅營運模式可將成本壓到
最低，呼籲王維基同京東共同以實際行動為市民謀福利。
　
　　同美團（０３６９０）Ｋｅｅｔａ當年攻港一樣，京東出手亦不留情，除咗推出「買貴就賠
」政策，仲要搞埋免費家電安裝服務，直接喊話王維基，叫ＨＫＴＶｍａｌｌ不妨都「學」下京
東香港嘅服務，挑機味十足！　
　
　　不過王老闆都唔執輸，就京東香港推出「買貴就賠」政策一事，質疑點解「買貴就賠」只包
括百佳、惠康、百老匯和豐澤等，但就唔包括ＨＫＴＶｍａｌｌ在內？係睇ＨＫＴＶｍａｌｌ唔
起，定係因為唔夠ＨＫＴＶｍａｌｌ平？
　
　　其實，京東同ＨＫＴＶｍａｌｌ雖然都係電商，但業務重疊部分其實唔係太多。京東出名以
家電及日用百貨為主，舊年該兩大業務佔總營業額八成。而按照ＨＫＴＶｍａｌｌ舊年上半年商
品交易分布，其中糧油雜貨及美健產品兩項合佔總交易額６７﹒７％，相反電子電器產品只佔
１０﹒５％。所以，兩家企業正面交鋒嘅情況應該無想象中咁激烈。
　
　　坦白講，香江市場咁細，京東大雞根本唔志在食細米，不過當係踏跳板，為開拓國際市場做
熱身。點都好，京東香港同王老闆呢場口水戰目前戰果睇嚟似乎係雙贏，各大媒體爭住報道，為
兩家企業免費賣廣告，如果可以做大本港網購嘅餅，咁王老闆都應該樂見其成，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。