《小傳日記》魚缸毫股仙股雞犬升天！發改委記招到底有幾堅？

　　《小傳日記》阿爺救市非同凡響，國慶最後一日假期，Ａ股準備回歸之際，救市號角時隔一
星期又再重新吹響，全日都講緊聽日發改委準備出乜嘢大絕，結果今日唔少股份都升定期先。
　　「唔少」嘅意思係真係有好多。魚缸總共２６４２隻股份，今日就有１７０７隻股份都報升
，百分比有六成四。睇返大市成交方面，除咗繼續２０００億銀以上之外，更加終止咗連續三個
交易日嘅跌勢，比起上星期五嘅２６００億銀回升至２９００億以上，按日回升反映真係有啲錢
流入押注Ａ股復市。
　　而今日魚缸更加神奇嘅地方係有好多隻平時唔郁嘅股大升，今日差唔多撳入個塊入面都會有
啲毫股仙股升兩成三成咁，今日好似就係有乜嘢之前無炒起嘅，今日都要炒返一樣。以往咁嘅情
況係唔常見，就係熱錢湧入到已經唔止係主要股份，而係全面到窿窿罅罅都有錢。
　　輪升市火車頭今日一定係晶片股，上個星期五全板暴升都唔夠，今日再嚟多次，而晶片板就
正好睇到窿窿罅罅都攝滿錢係咩情況。中芯（００９８１）同華虹（０１３４７）身為龍頭當然
繼續報升，分別再升兩成同一成六。全日最勁就係隻板塊入面隻腦洞（０２２０３），本業係賣
電子零件，但為孖屐所熟悉當然係「炒股概念股」嘅身份，結果今日搭著板塊順風車勁升
２﹒７５倍！反而成為晶片板塊最佳表現股份，可能係因為有大升市有「炒股概念」嘅ｂｕｆｆ
啦。但隨此之外，以往就算係大基金之類嘅好消息，板塊入面會升嘅都只係得頭嗰五、六隻龍頭
，但呢兩日係連康特隆（０１９１２）、品質國際（００２４３）同靖洋集團（０８２５７）之
類平時名不經傳嘅都集體飛天，就知今日真係有啲唔簡單。
　　聽日最主要就係「增量政策」，「增量」嘅意思應該就係目前見到嘅政策之內，再加推力度
，尤其聽係由發改委領頭開記招，應該會係針對工商行業居多，加推消費券、又或者係對科技公
司之類會有推動等等都係比較大機會，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。